DILI: Konfederasaun Sindikatu Timor-Leste (KSTL) realiza seminariu ho topiku “Haforsa Diálogu Sosial Hodi Prevene Violénsia Asédiu iha Mundu Traballo” hodi fahe informasaun no enkoraja traballadór no mós estudante sira atu labele tau ko’alia sai bainhira mosu violensia ka asédiu iha servisu fatin.

Prezidenti KSTL Almério Vila Nova hatete, KSTL hanesan parseiru husi organizasaun internasional ba traballo, iha implementasaun programa inisiativa spotligth atu halakon ka elemina violénsia hasoru feto no labarik feto iha Timor-Leste.

“Tanba Violénsia no asédiu iha mundu traballo ne'e fó impaktu boot tebes ba iha traballadór sira nia produtividade inklui mós ba empregadór sira nia empreza tanba ne'e mak inisiativa ida ne'e ho objetivu atu prevene no elemina kualker forma violénsia hotu ne'ebé feto sira hasoru iha servisu fatin,” dehan Prezidenti KSTL iha salaun Luz Klarita, Tersa (29/08).

Nia esplika, KSTL halo introdusaun ba konvensau 190, no KSTL produs ona livru matadalan ne'ebé ho naran poketgayt atu elemina violénsia no asédiu iha mundu traballo.

Tan ne’e, KTSL sei halo sensiabilizasaun ba Munisipiu haat hanesan Vikeke, Ermera, Bobonaro no Díli atu sensiabiliza informasaun hotu ne'ebé akomoda ona iha livru matadalan.

“Ami halo ona konsultasaun ba parte Governu liu-husi Sekretariu Estadu Formasaun Profisional no Empregu (SEFOPE) husu Governu nia hanoin atu kona-ba poketgayt atu prevene violénsia no asédiu iha servisu fatin,” nia hatoo.

Prezidenti hatete, KSTL sei konvida mós parte tolu hanesan Governu, Kamara Komersiu Industria Timor-Leste (CCITL-sigla Portugues) hamutuk ho KSTL atu halo sensibilizasaun ba hodi fahe informasaun ba traballadór no empregadór sira iha Munispiu haat refere.

Nia dehan, tanba atu halakon violénsia no asédiu nee la'os fasil, tan ne'e presiza envolvimentu parseiru hotu nia esforsu hodi bele prevene atetude at sira ne'ebé akontese iha servisu fatin.

Iha fatin hanesan, Diretór Jeral SEFOPE, Paul Alves hatete, TL iha ona kodigu lokal ne'ebé iha lakunas barak maibé seidauk iha lei ida atu proteje traballadór sira ne'ebé servisu iha industria rai-laran.

Tan ne’e, nia dehan, iha tinan 2023 SEFOPE aranka ona ho esbosu lei ne'ebé halo ona sosializasaun iha Munisipiu no mós iha Nasionál hodi rona ema nia hanoin kona-ba ba esbosu lei ne'ebé atu proteje traballadór feto sira iha servisu fatin.

“Tan ne'e, espera katak IX Governu bele aprova lei refere atu nune'e tinan oin bele aplika ona iha mundu industriais TL nian, atu nune'e ema balun ne'ebé akontese asédiu sexual hasoru sira durante ne'e sira nonok de'it karik ho baze lei ida ne'e bele aprezenta ona katak iha baze fundamenta ne'ebé proteje sira nia direitu banhira sira hasoru violensia,”  katak DJ.

Diretór hatete, iha tinan ida ne'e tau prioridade, SEFOPE iha ona departamentu informasaun merkadu traballo no espera katak SEFOPE bele halo peskiza ba iha industria sira iha TL. 

Iha biban ne'e mós, Reprezentante Kordenator UN iha TL Alex Tilman hatete, violénsia no asédiu ne'ebé akontese iha servisu fatin, sei iha fó impaktu ne'ebé boot ba traballadór ho empregadór feto sira no mós nasaun ida TL ba dezenvolvimentu ekonómiku.

DILI: Konfederasaun Sindikatu Timor-Leste (KSTL) nafatin husu ba Governu atu hasa'e ona salariu mininu ba traballadór sira, ne'ebé nia prosesu to'o ona iha Konsellu Ministru.