Portavós KSDS, João Aparicio hatete, enkontru ne'ebé sira halo atu halo avaliasaun ba seguransa nasaun nian iha tinan ida nia laran, liuliu iha fulan setembru durante iha vizita Santo Papa Francisco nian iha Timor-Leste.
"Enkontru ohin ninian ne'e konaba balansu seguransa tinan 2024, atu avalia seguransa nasaun nian, ita hatene katak iha tinan ida ne'e, maibé liuliu fulan Setembru vizita Sua Santidade Papa Francisco nian mai ita nia rai la'o di'ak tebes. Nune'e iha enkontru ne’e hatudu sinál konfiansa, seriedade no trankulidade, signifika katak iha respeitu boot tebes entre Timoroan fiar na'in ne'ebé simu sua Santidade Papa Francisco,”dehan nia iha Palasiu Prezidensial, Aitarak Laran, Dili, (27/12/24).
Portavóz ne’e hatutan, aleinde ko’alia kona ba seguransa durante vizita santo papa nian, iha mós pontu prinsipal iha enkontru ne’e mak, ko'alia kona-bá oinsa kontinua hametin koperasaun entre entidade seguransa iha rai-laran no mós estadu, hodi hametin ordem públika, inklui prenvensaun ba konflitu ne'ebé atu akontese iha tinan oin mai.
Enkuantu, iha enkontru ne’e, partispa masimu husi membru KSDS hanesan, Primeriu Ministru Kay Rala Xanana Gusmão, Ministru Justisa, Ministru Interior, Ministru Defeza, Ministru Negósiu Estranjeiru no Kooperasaun, Komandante Polisia Nasional Timor-Leste, Deputadu David Dias Ximenes Mandati, Diretor Servisu Nasional Intelejensia no membru seluk tan.
