Jornál INDEPENDENTE, harii iha Dili iha 4 Abríl 2011 ho nia edifísiu sentrál iha Dili hanesan kapitál nasaun Timor-Leste.
Jornál IDEPENDENTE, nia vizaun mak hakarak dezenvolve no hametin profisionalizmu média nian liu husi servisu jornalizmu ne’ebé Independente.
Nu’udar instituisaun média, Jornál INDEPENDENTE, hakarak sai mata-dalan atu eduka, informa no diverte liu husi publikasaun ne’ebé sei la sees husi kódigu étika jornalista nian.
Defende direitu umanu ne’ebé hanesan pilar importante ida ba moris sosiedade demokrátiku nian.
Sadere ba konstituisaun RDTL Artigu 40 no 41 ne’ebé ko’alia kona-ba liberdade de espresaun,nune’e, Jornál INDEPENDENTE, moris iha sosiedade nia leet atu sai ponte ba liberdade da espresaun ne’e ho responsabilidade tomak liu husi atividade publikasaun ida ne’ebé profisionál, balansu no sei inkilina ba interese individu ka grupu ruma, maibé sei tane aas liu interese públiku.
Atu asegura hanoin hira ne’e maka, komponente tomak husi Jornál INDEPENDENTE, nian sei hamahan-aan iha Estatutu no Regulamentu Internu ne’ebé kompañia estabelese atu regula hahalok no knaar jornalista tomak ne’ebé servisu hodi naran jornál ne’e nian.
Ezijénsia boot ba komponente tomak iha jornál ne’e nia laran, liuliu ba jornalista sira mak “tau aas dignidade jornál ne’e nian, respeita malu, hatudu profisionalizmu servisu, fó sai lia loos, asegura interese públiku no hakru’uk ba Konstituisaun Repúblika Demokrátiku Timor-Leste.
