DILI: Primeiru-Ministru (PM), Kay Rala Xanana Gusmão akompaña hosi Ministru Obras Públikas (MOP), Samuel Marçal no Sekretáriu Estadu Asuntus Toponímia no Organizasaun Urbana (SEATOU) Germano Santa Brites Dias ho ekipa tomak kontinua organiza limpeza iha sidade Dili, iha loron sesta (27/12/2024).

Partisipa iha limpeza ne’e funsionáriu sira hosi Ministériu Obras Públikas (MOP), Ministériu Administrasaun Estatál (MAE), Institutu Jestaun Ekipamentus no Apoiu Dezenvolvimentu Infraestrutura, Institutu Públiku (IGEADI.IP) no Korpu Bombeirus Timor-Leste.

“Ita tenke hamoos bebeik foer sira ne’e, selae moras mai ita nia oan no ferik katuas sira maka sei sofre bebeik, ita kontinua apela nafatin ba komunidade para iha konsensia soe foer iha lixu, la’ós mai soe arbiru de’it iha Estrada no  valeta laran,”dehan PM Xanana liu husi komunikadu ne’ebé Online INDEPENDENTE asesu, iha pajina GPM, (28/12/24).

Durante limpeza mezmu rai udan, maibé Xefe Governu no ekipa ne’ebé hetan apoia hosi empreza sira hanesan Montana Di’ak, Haksolok no Bandido Qualidade no seluk tan kontinua tama sai bairru- laran hodi hasai no hamos lixu ne’ebé komunidade sira soe arbiru iha estrada laran no baleta sira durante selebrasaun loron natal.

Iha obserbasaun nota, komunidade soe foer arbiru ba estrada laran no valete, mezmu ekipa MAE prepara ona fatin lixu nian. Impaktu hosi foer ne’ebé soe arbiru halo fatin lixu hirak ne’e dois no hamos ular oin-oin maka mosu iha lixu laran ne’ebé bele afeita ba komunidade sira nia saúde.

Hafoin limpeza, Xefe Governu Xanana ho ekipa kontinua obserba kondisaun Merkadu Manleuana nian ne’ebé kontinua loke luan ba kotuk hodi fó fatin ba negosiante hirak ne’ebé muda hosi kapital Dili bele hala’o atividade negosiu iha fatin foun ne’e.

Tuir planu, Primeiru-Ministru ho ekipa MOP sei kontinua mobiliza limpeza iha Díli iha loron sira tuir-mai hodi evita inundasaun durante tempu udan.