Komandante Komponente Navál F-FDTL, Komodoro Higino das Neves, informa, udan ne'ebé akontese iha inisiu fulan-Janeiru tinan 2025, iha Hera rezulta infraestrutura militar iha baze Komponente Naval pursentu 90 hetan estragus.
Nia dehan, kauza husi inundasaun ne’e mak mai husi barajen ne'ebé empreza halo ho medida kiik, nune’e labele satan bee husi mota Kiik iha área Hera nian, bainhira akontese udan husi foho ho intensidade boot, tanba ne’e, mota tenke halai tama ba iha baze Naval laran hodi provoka indundasaun.
“Horseik (01/01) lokraik komesa udan uituan derepente mota tolu iha Hera hasoru malu, Bronjon ne'ebé empreza halo ne'e, mai Komponente Naval badak liu entaun mota tolu ne'e hasoru malu, entaun fura tiha Bronjon ne'e no bee tama mai iha baze Naval destrui infraestrutura iha baze Naval Hera, fasilidade militar ne'ebé hetan estragus ne'e pursentu 90 aat hotu la aproveita, kompostu husi karreta rua mak aat no karreta sira seluk aat maibe balun sei moris, motor fuzileiru nian mak kuaze barak mak aat, no kilat sira iha armazem bee tama hotu hodi hetan estragus, kazerna sira la aproveita hotu tanba bee tama inklui komputadór sira mós ita la salva,”dehan Komodoro Higino ba Jornalista sira iha Baze Komponente Naval, Hera, Kinta (02/01/25).
Nia hatutan, hafoin inundasaun ne’e akontese, Komponente Naval la halo servisu militar nian, tanba sasan hotu hetan estragus.
“Ohin dader (horseik), ami hamoos seida’uk hotu, tanba ami desde horikalan (01/01), la tein tanba bee tama no apartir horikalan la tein, Militár sira husi Metinaro mak tein hodi oferese ba ami Komponente Naval,” informa nia.
Nia haktuir, dadaun ne’e forsa komandante Terrestres Baukau, Unidade FALINTIL, Kuartél Jenerál, sentru Instrusaun Komandante Nicolau Lobato Metinaro, Unidade Apoiu Servisu ajuda ona hamoos foer sira, inklui Bombeiru ho Institutu Jestaun Apoiu Ekipamentu Dezenvolvimentu Infrastrutura no Ministeriu Obras Públika mós ajuda normaliza ba mota, nune’e bainhira udan, mota labele tama tan ba iha baze Komponente Naval nia fatin hodi provoka inundasaun.
Tuir Komodoro, inundasaun ne’ebé akontese iha Baze Komponente Naval Hera dadaun ne’e ba dala-haat ona.
Tanba ne'e, presiza kustu boot ba manutensaun ba sasan sira ne'ebé hetan estragus husi inundasaun.
Iha fatin hanesan Xefe Estadu Maior F-FDTL, Brigadeiro Jenerál José Soares "Trix" hateten infraestrutura militar no fasilidade militar iha Komponente Naval Hera pursentu 90, sasan hotu destroidu tanba kauza husi udan boot horseik loraik tuku 02:00 Meudia.
Nune'e mós Vise Xefe Estadu Maior Jerál F-FDTL Maijor Jenerál Calisto dos Santos "Coliati" afirma, kona-ba kilat no ekipamentu hotu ropa militar sira nia kazerna destroidu total.
"Ita Konta dehan infrastrutura iha baze Naval Hera destroidu inklui kilat, ida ne'e mak presiza intervensaun urjente husi Obras Publika tanba baze Naval ne'e nasaun ninia ne'e la’ós individu, ne'e la’ós kompañia privadu ruma, ne'e infraestruta baze nasaun ninia, ha'u hanoin katak situasaun sira hanesan ne'e poder politiku iha área infrastrutura tenke tau atensaun atu fó nia apoiu urjente tanba tempu ne'e ita lahatene agora ne'e loron manas mas iha foho leten ne'e nakukun ona, sé mota tun fali oinsa? sé obras publika la fó apoiu ne'e oinsa,” afirma nia.
Nia dehan, situasaun Dezastre ida ne'e la'ós halo kritiku maibe ida ne'e apelu deit katak poder politiku iha nasaun ne'e tenke tau atensaun ba situasaun ne'e tanba infraestrutura iha naze Naval Hera ne'e nasaun no povu nian sosa ho ruin no ran.
"Iha tinan rua nulu ita nia Estadu ita nia Governu lakon osan barak, agora ba ita hotu ne'ebé servidor Estadu, servidor ba nasaun ita ida-idak tenke atensaun iha ita nia papel atu haree ba kestaun sira hanesan ne’e, ita agora iha faze konstrusaun Estadu, ami la’ós ejize, ami la hirus, ami nia kilat hotu no labarik sira nia ropa inklui sasan hotu ba para hotu iha tasi," hakotu nia.
