Tuir komunikadu ne’ebé Online INDEPENDENTE asesu iha Pajina Gabinete Primeiru Ministru, haktuir katak, Konta Jerál Estadu 2024 ne‘ebé prepara husi Ministériu Finansas ho baze informasaun sira ne’ebé fornese husi órgaun sira Governu nian no mós servisu públiku sira.
Dokumentu ne’e abranje informasaun finanseira oioin, inklui rezultadu agregadu sira no individu husi entidade governamentál oioin, hanesan Fundu Konsolidadu Timor-Leste, Fundu Infraestruturas, Fundu Dezenvolvimentu Kapitál Humanu no seluk tán.
“Konta Jerál Estadu ne’e aprezenta detallada kona bá reseita no despeza sira ne’ebé la’o durante tinan 2024, inklui saldo finanseiru iha finál períudu ida ne’e nian,”dehan komunikadu refere.
Entretantu, proposta OJE tinan 2024 ho valór totál konsolidadu millaun rihun $1,95 bá Administrasaun Sentrál RAEOA no Seguransa Sosiál, sein Fundu Rezerva Seguransa Sosiál.
Valór ida ne’e inklui dotasaun millaun rihun $1,83 ba Administrasaun Sentrál no millaun $60 uza bá RAEOA.
Husi montante totál despeza ne’ebé prevee bá Administrasaun Sentrál no RAEOA, millaun $468,8 uza bá saláriu no vensimentu, millaun $386,3 bá bens no servisu, millaun $589,7 bá transferénsias públikas, millaun $34,2, bá kapitál menór no millaun $411 bá kapitál dezenvolvimentu.
Orsamentu Seguransa Sosiál, inklui Fundu Rezerva Seguransa Sosiál, iha montante millaun $347,6.
OJE tinan 2024 prevee ho valór millaun $788,2 bá asuntu ekonómiku, millaun $467,1 bá protesaun sosiál, millaun $140,9 ba edukasaun, millaun $66,2 bá saúde no millaun $45,2 bá abitasaun no infraestruturas koletiva.
Enkuantu, bá tinan 2025, Xefe Governu deklara sei kontinau hadi’a sistema finansas no aprovizionamentu iha ministériu hotu hodi kumpre regras finanseiru nian hodi hafasil ezekusaun no kontrolu orsamentu estadu nian liga ba pagamentu ba projetu estadu nian no seluk tan.
