Tuir Komunikadu ne'ebé Online INDEPENDENTE asesu katak, apoiu emerjensia ne’e bazeia Dekreitu Lei numeru 7/2021/22 de Junho ne’ebé hateten katak Autoridade Proteção Civil (APC) nia papel importante ida mak apoiu emerjensía no rekoperasaun ba família vítima sira ne'ebé afeitadu ba dézastre naturais iha Teritoriu Nasional.
Ho nune’e, iha loron 02 fulan Janeiru tinan 2025, Sekretáriu Estadu Protesaun Sivil Domingos Mariano Reis ho Ministra Solidariedade Sosiál no Inkluzaun Verónica das Dores no ekipa Autoridade Protesaun Sivil Kontinua hala'o observasaun direita ba membro familia 67 ne'ebé afeitadu ba inundasaun hodi apoiu mós ai han emerjensía ba vitima refere.
Sekretáriu Estadu Protesaun Sivil Domingos Mariano Reis hateten apoiu emerjensía ne'ebé Governu distribui ne'e mak atu tulun família vítima sira.
Governante ne'e mós infórma katak governo la’ós apoiu deit ai-han emerjensía maibé iha tempu badak Governu sei apoiu matérial rekoperasaun ba vítima ne'ebé nia uma hetan estragus husi dézastre naturais.
“Tanba ne'e dadaun ne’e ekipa Autoridade Protesaun Sivil (APC) liu husi Autoridade Protesaun Sivil Munisipíu Dili, halo hela Levantamentu dadus ba vitima ne'ebé mak hetan inundasaun iha Suku-Hera,” dehan Komunikadu ne'ebé Online INDEPENDENTE asesu iha Pájina ofisiál SEPC, Kinta (02/01/25).
Entretantu, iha biban ne’e Sekretáriu Estadu Protesaun SIvil la haluhan lori IX Governu Konstuitisíonal nia naran ne'ebé lidera husi Primeru Ministru(PM) Kay Rala Xanana Gusmão hato'o solidaridade ba familia vitima sira ne'ebé afeitadu ba inundasaun.
