Dom Virgilio Kardeal dehan, tinan 2024 nia memória dalaruma bele husik hela esperénsia balun ne’ebé moruk, kanek no mós faillansu ruma iha relasaun, maibé haree ba tinan 2024, ema ida-idak koko momentu ksolok lubuk ida, ne’ebé ema ida-idak hasoru, balun ksolok ne’ebé lori progresu ba aan rasik no grupu, susesu no konkista sira ne’ebé halo orgullu.

“Hakarak ka lakohi, tinan 2025 to’o mai daudaun, mai hamutuk hakat ba tinan 2025 ho hakat ksolok nian, hakat esperansa nian. Hanesan tinan 2025 ne’ebé Papa Francisco hanaran “Jubileu da Esperança,”.

“Ita bele dehan kalan ida ne’e sai hanesan kalan atu fó obrigadu, kalan atu agradese. Tinan 2024 oras-oras tan sei liu, furak mós ba ita ida-idak, iha tinan ne’e, ita bele husu ba ita án rasik, esperiénsia saida mak ha’u hetan iha 2024, valór ka sentidu ba ha’u mak saida?. Iha buat ruma konkretu ha’u bele kaer, bele sukat. Buka no haka’as án atu aproveita oportunidade hotu ne’ebé iha no hakat ba simu tinan foun 2025 ho ksolok no esperansa,” dehan Kardeal.

Tuir Kardeal, tinan foun signifika Maromak fó ba Nia povu oportunidade ida tan atu krexe, la’ós iha isin de’it, iha neon de’it, maibé mós iha espíritu, atu ema bele aproveita hodi mellora liutan nia aan, atu hatene nu’udar ema, Maromak nia kriatura, nune’e oportunidade atu bele hatene Maromak, hadomi no atu bele serví Maromak iha ida-idak nia kontestu iha família no servisu fatin.

“Tinan foun hanesan momentu sira ne’ebé konvida ema, maske iha ta’uk barak maibé bele loke liman ba oportunidade no posibilidade sira ne’ebé sei mai.

Ema la hatene saida mak sei mosu, maibé ohin ita mai atu agradese tamba Maromak fó buat barak ona ba ita. Ohin ita mos hakarak atu harohan atu Maromak tulun ita fó liután sentidu ba selebrasaun ohin kalan nian,”.

Ho nune’e, Kardeál hakarak konvida sarani sira hotu atu hanoin kona-bá leitura ohin nian iha primeira leitura husi Livru Ben Sira ne’ebé ko’alia kona-bá tempu, iha tempu atu moris, iha mos tempu atu mate, iha tempu atu ko’alia, iha mós tempu atu nonok no rona, iha atu hadomi, iha tempu atu hari dame.

Tanba ne’e iha leitura ne’e atu hanorin ema katak los dunik ema ne’e moris iha tempu ida nia laran. Iha hun no iha mos rohan.

Iha segunda leitura mós bolu ema nia atensaun no fó deskrisaun ida kle’an kona ba pasajen leitura ida kle’an katak “ha’u hakerek ba imi la’ós tanba imi la hatene maibé tanba imi hatene duni katak lia bosok la mai husi lia-loos.”

“Husi esperiénsia moris, ema hotu hatene katak loos duni ema nu’udar kriatura Maromak nian, moris ne’e mai husi Maromak de’it, maibé hanoin fila fali ba istória salvasaun nian oinsá mak samea lori promesa falsu ba Eva no Adão hodi muda sira nia moris. Ne’e hatudu katak lia-bosok ne’e mak dala barak sai obstakulu ba ema no ema mós lori hela tendénsia boot ida ne’e, hodi hanoin katak ita mak na’in no autór ba ita nia moris rasik,”.

Iha Evanjellu husi São João ko’alia kona-bá oinsá Jesus prepara nia apóstolu sira. São João hakarak hateten kona-bá João Baptista ne’ebé fó sasin kona ba naroman ne’e.

“Mai ita tama ba tinan foun 2025, la’ós ho ahi ne’ebé ema halo ho liman, la’ós mós ho fogete nia naroman, la’os mós ho paixón nia tarutu, maibé ho naroman natal ninian, Maromak Kosok oan nian ne’ebé mai atu fó fali esperansa ba ita, Nia mak naroman mundu nian, liurai dame na’in nian,” tenik Kardeál.

Entretantu, kada tinan, iha loron 01 fulan-Janeiru, amu Papa sempre husu atu sarani hotu hanoin kona ba Páz no iha loron ne’e mós loron bo’ot liu hodi selebra solenidade Maromak Nia Inan nian.