Tuir Komunikadu ne'ebé Online INDEPEDENTE asesu iha Pájina ofisiál Eis PR Lú-Olo katak, tebes duni, hori kalan iha 00:00 tinan fahe malu, ema deskoñesidu, aproveita foguetes nia tarutu, tiru kilat tama rezidensia Eis-PR no Prezidente Partidu FRETILIN, Francisco Guterres “Lú-Olo,” ho intensaun aat atu oho nia.
Komunikadu haktuir, Kilat musan (bala real) ne’e fura husi kalen uma tun too kona mesa nia vidro rahun hotu, besik los tur fatin baibain ex-PR nian iha uma.
Hafoin akontesimentu ne’e mosu, seguransa pesoal eis-PR informa kedas ba Komando PNTL, F-FDTL, PCIC, PM, Intelijensia Militar no Polisia Forensik to’o kedas uma rezidensia hodi halo observasaun direita no halo investiga kona ba faktu ne’ebé akontese.
“Obrigado ba imi nia profissionalismo liu husi prátika ne’ebé hatudo iha tempo ne’ebé mosu perigo ba ema nia vida. Iha biban ida ne’e ha'u fo hatene mós ba seguransa pessoal ba Titulares Orgaun Soberania nian ka Eis-titulares nian atu hola atensaun no fó seguransa diak ba ita nia nai ulun sira hotu-hotu. Obrigado ba atensaun no kontinuasaun Boas Entradas Tinan Foun 2025 ba ita hotu,”dehan Komunikandu ne'ebé Online INDEPEDENTE asesu iha Pájina ofisiál Eis Prezidente Repúblika Francisco Guterres Lú Olo, Kuarta (01/01/2025).
Entretantu, komunikadu ne’e hatutan katak, antes ne’e mós iha ona ema tiru Kilat musan tama iha rezidensia Eis-PR no partido FRETILIN.
