Padre Agustinho Soares, liu husi nia omilia iha misa agradesimentu bá tinan 2024, hatete, hanesan sarani rona iha evangelhu katak ema moras lepra na'in 10 ne'ebé hetan isin di'ak fila-fali, tanba ne’e, sira husu agradese bá Jesus.

“Tan ne'e, ita mós iha kalan ida ne'e iha ema barak hamutuk iha uma kreda atu agradese bá Maromak bá grasa oin-oin ne'ebé ita hetan," dehan Padre Agustinho liu nia Ómilia iha Kapela Lagoa I Tasi-tolu, Tersa (31/12/24).

Amo selebrante ne’e hatutan, sarani sira tenki agradese ba Maromak, ba sira nia saúde no ba susesu husi familia ne'ebé moris hamutuk hela, no mós bá buat ksolok nian ne'ebé hetan iha tinan 2024 nia laran.

"Ita agrdese bá Maromak bá grasa barak ne'ebé ita la hare ho matan, maibé Maromak tau hela nia liman iha ne'ebá,” katak Padre Agustino.

Amu Lulik ne’e akresenta liu tan, nafatin agradese bá Maromak, maske iha tinan 2024, iha ema ne'ebé hadomi tebes,  Maromak bolu tiha iha tinan ida ne'e, tanba nu’udar sarani tenki tuir Jesus kristu ne'ebé prega iha krus nu’udar sinal domin bá sarani hotu no mós agrades bá Maromak maske iha tinan 2024 nia laran, iha ema balun ne'ebé hetan susar kona-bá moris, maibé Maromak nafatin akompaña.