Vise Prezidente Partidu FRETILIN, José Manuel ‘Nakfilak’ informa, iha 28 Dezembru ne’e, Komite Sentral FRETILIN (CCF) entrega ona konvite PR Horta nian ba Xefe Kaza Sivil Prezidensia Republika.

Serimonia atribuisaun sertifikadu ba PR Horta ne’e sei realiza iha salaun Konsellu Kombatentes Libertasaun Nasionál, Komoro.

“Figura ida mak Prezidente Republika, José Ramos Horta, hanesan fundador. Loron 31 Dezembru mak imi (jornalista) haree líder see-see tan,” dehan Nakfilak ba jornalista sira, iha CCF Komoro, Sábadu (28/12).

Molok ne’e, PR Horta hatete, nia prontu simu sertifikadu rekoñesimentu husi CCF.

"Ha'u 27 (Dezembru) sai ba (rai) li’ur, ha'u fila 31 Dezembru lokraik. Se ha'u simu konvite ha'u sempre ba, klaru ha'u laiha problema ho ida ne'e. Ha'u sempre la haluha, ha'u bele fundadór fraku, ha'u-nia kontribuisaun bele fraku maibé ha'u fundadór duni."

"Pelumenus ha'u bele hatete ASDT ne'e ha'u fundadór, ne'e ha'u ho avo Xavier, agora FRETILIN ha'u fundadór bele fraku uitoan karik, maibé fundadór duni. Sempre respeita memória hotu-hotu iha FRETILIN ne'ebé mate iha tempu luta," hatete nia.