Dom Virgilio Caredeal do Carmo da Silva dehan, povu ne’ebé la’o iha nakukun laran hare naroman bo’ot ida, sentidu saida? banihira ko’alia kona-bá naroman bo’ot mosu iha nakukun laran.
Natal hatudu, rahun di’ak ne’ebé mai lori salvasaun ba umanidade tomak, ho grasa ne’ebé los, Maromak ninia domin bele dehan katak transforma, nakfilak ba moris, domin ne’ebé renova istoria domin, ne’ebé liberta buat ne’ebé aat, gravidaun, domin ne’ebé lori damen no ksolok.
“Kalan ne’e Maromak hatudu nia domin mai ita husi sé, husi nia oan Jesus, iha Jesus mak ida ne’ebé aas liu hotu, halo aan kiik ida ne’ebé aas liu hotu, maibé hatene haraik aan halo kiik liu ita hotu-hotu,” dehan Dom Virgilio Cardeal do Carmo da Silva liu husi nia ómilia iha selebrasaun Misa Natal iha Igreja Parókia Imaculada Conceição, Katedral Dili, Tersa (24/12).
Kardeal esplika, Maromak halo aan kiik atu ema hotu bele hatene no hadomi katak Maromak halo aan kosok oan ida, tan ne’e banhira ema hotu, kosok oan hotu-hotu hakarak kous ka hakuak, tan ne’e Maromak halo aan kiik, atu nune’e ema hotu bele besik ba nian.
“Maromak la halo nia aan hanesan liurai atu ema hotu dook, maibé halo aan hanesan ema kiik atu nune’e ema hotu bele besik. Maske iha mundu la’o ho lojika ida katak domin fó no ho simu, ho Maromak la iha fó ho simu maibé Maromak fó domin gratuita,”tenik Kardeal.
Maromak nia domin ema la negosia maske la soi atu simu, nune’e mós nunka bele rekompensa, los duni katak Maromak fó nia domin ema hotu la soin ba ida ne’e, hanesan iha Nai feto iha anunsiasaun, maibé domin nia fó la iha abilidade atu rekonpensa hanesan nai Maromak fó ba ema.
“Maromak nia domin mosu husi kalan, kalan ne’e ita rekoñese, maske ita la soi, maske nia halo an kiik liu buat hotu-hotu, ita buka buat ne’ebé ita hakarak nia mai hela iha ita nia leet,”.
Lider Igreja katolika ne’e hatete, Natal fó hanoin ba ema hotu katak Maromak hanoin nafatin ema, Maromak Hadomi ema ida-idak to’o iha ne’ebé de’it.
Natal mós konvida ema hotu atu la to’o deit iha preukupasaun ema ida-idak nian, maibé koko atu halo ema seluk kontenti, tanba ida ne’e Maromak oan hanorin ba ema hotu-hotu.
