Dom Leandro Maria Alves dehan, Jesus kosok oan hamnasa atu lori ema hotu ba hamutuk hodi hetan ksolok, tanba ne’e mak Natál nu’udar festa ksolok ninian.

Kristu nia prezepiu hateke ho hamnasa no hakarak hakuak no loke liman hakarak hakuak sarani sira, Jesus hakarak hakuak ema hotu tan nia hatene katak ema presiza tebes nia, nia hatene katak ema hotu lori hela todan boot iha ida-idak nia kabas.

Tan ne’e Jesus kosok oan mai atu foti  todan sira hotu no halo ema hotu hamnasa hamutuk ho nia no ho nia maluk sira.

“Agora ita haksolok duni, tanba ita hare Jesus moris, maibé la’ós atu lanu, ksolok hodi fó paz ba malu, buka atu fó paz no fó liman ba malu, hatudu liman domin nian ba malu, la’ós hatudu lian adio no vigansa ninian,” dehan Bispo Dom Leandro Maria Alves nia nia omilia iha selebrasau  festa natal, iha igreja Katedral Santo Antonio Baukau, Vila Antiga, tersa (24/12/24).

Bispu Dom Leandro hatutan, Maromak hola isin ema nian, sai ema hanesan ita, kalan ida ne’e hateke ba prezepiu hodi hare hetan Maromak konkretiza nia domin no nia laran luak ba universe kalan ida ne’e, ema hotu haksolok hodi hahi Maromak hamutuk ho anju sira hananu hodi dehan “gloria in excelcis deo”.

Tanba iha kalan natal nia realidade hatudu katak Maromak mai vizita nia povu, Maromak mai horik hamutuk ho nia povu, ne’e duni kalan ne’e sai kalan ksolok boot ninian, tan ema hetan ninia naroman.

Tuir Dom Leandro katak, Kosok oan ne’e nu’udar Dom ka grasa Maromak nian ba Maromak ninia povu, kosok oan ne’e sei halakon funu, odio no terus sira no lori mai mundu no harii mundu ida ne’ebé nakonu ho ksolok, felisidade no páz.

Espresaun alegria ksolok deskreve hatudu liu husi liafuan hirak ne’e, silu tohar ema aat sira nia bee, ne’ebé hakanek povu nia kabaas, sunu hotu botas funu nian, sunu hotu hena bee ran nakonu, sira ne’e sei sai ai-tetuk.

“Leitura ne’e hatudu momos mai ita katak Maromak la presiza ho liman kroat ho forsa ka ezersitu atu bele interven mundu maibé Maromak hatudu ninia kbiit liu husi ema kbiit la’ek sira liu husi kosok oan kbiit Maromak nian ne’e mak páz no hakmatek, páz hakmatek sai nudar forsa Maromak nian ne’ebé hatudu aan iha kosok oan ita nain jesus kristu,” katak Bispu.

Kosok oan ne’e mesmu ke prazu fraku depedensia maibé atraiante dada ema hakbesik an ba nia, la dada ema ho lian kroat maibé ho hamnasa, hahalok ida ne’e no hahalok ne’ebé Amu Papa Francisco koalia kona-ba Timoroan sira hamnasa alegria.

Timoroan sira mak nakonu ho hamnasa, nakonu ho kontenti, Timor ne’e povu ida ne’ebé haksolok, povu ida ne’ebé hamnasa.

Ida ne’e vertude ida ne’ebé diak tebes, ida ne’e rikusoin ida ne’ebé presiza kaer no hamoris atu bele hari sosiedade timorense ne’ebé moris iha damen nia laran.