Iha 30 Junu, maizumenus tuku 12:30 OTL, Xanana ne’ebe to’o iha Aeroportu Internasionál Prezidente Nikolau Lobato ho Aviaun Citilink, husi nia vizita ofisiál iha Portugal, hili atu la hasai liafuan ruma kona-bá Saudozu Lu Olo nia pasajen.
Bainhira to'o iha Aeroportu, Primeiru-Ministru simu direta husi Vise-Primeiru-Ministru, Mariano Assanami Sabino akompaña husi Membru Governu sira inklui Deputadu balun husi Bankada CNRT no Prezidente Tribunal Rekursu, Afonso Carmona no entidade sira seluk.
PM Xanana komprimenta entidade sira ne’ebe simu, hafoin la'o tama ba sala VIP.
Tanba haree jornalista barak husi Média Nasional ne'ebé preparadu, nune'e Xefe Governu deside hakat bá podium ne'ebé prepara ba konferensia imprensa.
Xanana ne'ebé akompaña husi Vise Primeiru-Ministru no Sekretáriu Estadu Komunikasaun Sosial, Expedito Dias Ximenes, atualiza rezultadu vizita ofisial ba Rusia no Portugal.
Bainhira tama iha sesaun pergunta, jornalista sira husu kona-bá falesimentu Eis Prezidente Repúblika, Lú-Olo.
PM Xanana rona no fo atensaun, maibé molok pergunta ne’e remata, PM Xanana hatene bá jornalista ne'ebé husu pergunta nia oin, tuun husi podium no lao sai ho nonook.
Jornalista sira tenta nafatin atu bele hetan komentariu ruma husi Xefe Governu ne’e, maibé la konsege tanba Xanana ‘taka metin’ ibun no sa’e daudauk bá karreta laran.
