Pasiente ida, Cipriano Gomes dehan, ho ezistensia HNGV ba tinan 23 ne’e, prioridade boot ne'ebé presiza hadi'a la'ós de'it infraestrutura ka ekipamentu, maibé disponibilidade aimoruk ba tratamentu pasiente sira.

"Ha'u mai konsulta tanba moras mear no isin manas. Médiku fó reseita aimoruk oin lima, maibé HNGV fó de'it oin tolu, no rua seluk haruka ha'u ba sosa iha apotik. Hanesan povu ki'ik, ha'u laiha osan atu sosa," dehan Cipriano.

Nia husu governu no parte HNGV atu aniversariu ne’e sai nu’udar oportunidade atu hadi'a stock aimoruk, tanba buat ida ne'e mak afeta diretamente ema ki'ik sira ne'ebé depende de'it ba servisu saúde públiku.

"Se osan iha, ha'u bele sosa. Maibé povu barak laiha kapasidade atu sosa aimoruk. Tanba ne'e ami husu aumenta stock ai moruk iha HNGV," nia hatete.

Preokupasaun hanesan mós hato'o husi pasiente Idelfonso da Costa Freitas, ne'ebé dehan dala-barak nia mai halo konsulta ba moras próstata, no HNGV kontinua fó de'it reseita no haruka nia ba sosa aimoruk iha apotik privadu.

"La'ós dala ida de'it, maibé dala haat ona ha'u simu reseita atu ba sosa aimoruk rasik. Ida ne'e sai todan ba pasiente sira," dehan nia.

Aleinde problema aimoruk, Idelfonso mós kritika sistema atendimentu ne'ebé dala-ruma kleur loos antes pasiente hetan tratamentu.

Nia husu konsellu diretivu HNGV hadi'a sistema atendimentu no aumenta ekipamentu médiku atu servisu bele lao lalais no di'ak liu.

Hatan ba kritika ne'e, Diretór Ezekutivu HNGV, Nuno Vital Soares, admite katak fornesimentu aimoruk depende husi Instituto Nasional Farmásia no Produtu Médiku (INFPM), maibé ospitál kontinua halo planeamentu kuantifikasaun atu asegura nesesidade aimoruk ba tinan tomak.

"Ami halo planeamentu no kuantifikasaun ba pedidu aimoruk durante tinan ida. Ami sei kontinua hadi'a sistema fornesimentu atu responde ba nesesidade pasiente sira," dehan Nuno.

Nia mos hatete, HNGV sei kontinua investe iha ekipamentu médiku modernu, inklui instalasaun CT-Scan foun, ne'ebé espera bele hamenus transferénsia pasiente ba tratamentu iha rai li'ur.

Tuir nia, durante tinan 23 HNGV halo progresu importante liu husi dijitalizasaun kartaun konsulta. Sistema rejistu manual ne'ebé uluk uza ona troka ba sistema eletróniku, no ba oin Ministériu Saúde sei estende sistema ida ne'e ba sentru saúde iha munisípiu hotu.