DILI: Partidu FRERTILIN preokupa hela projetu lubuk ida ne’ebé laiha transparénsia kona-ba ninia kualidade, inklui laiha informasaun detallu ba dívida naun finanseira nian.

DILI: Parlamentu Nasionál liu husi Konsellu Administrasaun Parlamentár iha ona hanoin atu sosa karreta foun 65 ba deputadu sira. Planu ne’e sei prevé iha Orsamentu Jeral Estadu 2019 nian.

KALAN ne'e nia tanis nakfera hodi fó sinál ba nia prezensa. Nia seidauk hatene buat ida. Ida ne'ebé nia sente mak malirin kaer tomak nia isin. Nia nonook hikas sein hatene no koñese see mak lori nia mai.

DILI: Deputadu bloku aliansa Aliansa Mudansa ba Progresu (AMP) iha uma Fukun Parlamentu Nasionál seidauk serteza atu fó autorizasaun ba Prezidente Repúblika, Francisco Guterres ‘Lú Olo’, atu halo viajen ba estranjeiru bainhira seidauk promulga Orsamentu Jerál Estadu (OJE) 2018 nian.

Tuir planu, Xefe Estadu sei halo vizita ba nasaun lima (5), ne’ebé sei hahú husi Austrália iha loron 21 Setembru 2018. Nune’e, kontinua ba Estadu Unidus Amérika (EUA), Indonézia, Vatikanu no ikus liu iha Dezembru ba Áfrika.

Deputadu bloku AMP husi Bankada PLP, Abel Pires hatete, viajen Prezidente Repúblika lori Estadu nia-naran no importante atu konsidera, maibé presiza mós haree ba problema iha rai laran ne’ebé seidauk rezolve.

Situasaun rua maka Prezidente Repúblika presiza rezolve imediata hanesan promulga OJE 2018 no pose ba restu membru governu.

“ita haree promulgasaun OJE mós seidauk klaru, tanba ne’e di'ak liu ita labele kolia lai buat seluk. Haree lai ba saida mak prioridade ba povu nia moris”, dehan nia, iha Uma FUKUN PN, horisehik.

Nia dehan, iha Segunda (17/9), PN sei halo plenária hodi aprova Xefe Estadu ninia dezlokasaun, maibé to’o iha loron ne’e maka orsamentu seidauk promulga ne’e presiza tetu fila-fali.

Iha fatin hanesan, Deputadu Bankada Partidu Demokrátiku (PD), Mariano ‘Assanami’ Sabino hatete, vizita Presidente Repúblika nian ba iha rai li'ur lori Estadu nia naran, tanba ne’e hanesan reprezenta povu iha uma fukun sei apoia.

“Uluk ita maka dehan Prezidente Repúblika tenke ba vizita Estadu iha rai liur atu bele lori Timór ba mundu, maibé ita rasik mak impata fali viajen ne’e la loos ona”, tenik nia.

Hanesan membru governu ne’ebé seidauk kompletu ne’e problema interna, tanba ne’e mai kolia ba malu, halo diálogu oinsá bele buka solusaun. Labele lori problema interna hodi impata viajen Xefe Estadu nian.

Governu Husu Promulga Lalais

Entretantu, Primeiru Ministru (PM), Taur Matan Ruak, husu ba Xefe Estadu atu promulga lalais OJE 2018.

“Ha’u mós husu ba Prezidente Repúblika promulgasaun ne’e lalais uitoan di’ak liu, tanba orsamentu ida ne’e krusiál ka determinante loos atu estabiliza definitivamente ita nia tezouru no mós despeza sira iha 2018 ne’e”, dehan PM Taur.

Karik demora promulgasaun ne’e governu sei enfrenta risku. Maski nune’e, nunka fó presaun ba Prezidente Repúblika atu promulga tanba tenke iha regra ne’ebé la’o tuir.

“Ha’u mós uluk Prezidente Repúblika, tan ne’e ha’u bainhira ko’alia ho Prezidente Repúblika ne’e halo nusa no saida maka ha’u hateten no saida maka labele hateten”, dehan nia.

Nia dehan, situasaun krítiku ne’e ho sentidu katak fulan ne’e ba oin governu depende maka’as ba promulgasaun OJE 2018, ne’ebé hetan ona aprovasaun husi Parlamentu Nasionál no agora daudaun Prezidente Repúblika sei estuda hela.