Diretór Ezekutivu empreza, Christopher Moyes informa,kompaña ne’e fura ona posu mina hamutuk tolu iha rai-maran no agora prepara atu avansa ba faze avaliasaun no dezenvolvimentu.
“Empreza Timor Resources fura ona posu mina tolu iha rai-maran iha Timor.Ami haree atu avansa esplorasaun ba avaliasaun no dezenvolvimentu. Ohin ami iha oportunidade atu hasoru-malu ho Primeiru Ministru no fahe ami-nia interrese ba projetu idane’e,”dehan Christopher, iha Palasiu Governu.
Nia mós hato’o katak enkontru ho PM Xanana importante atu fahe planu no husu apoiu Governu atu garante projetu ne’e bele kontinua ho benefísiu ba empreza no mós ba Timor-Leste.
Planeia fura posu foun
Timor Resources mós planeia atu fura posu adisionál iha futuru atu dezenvolve rezerva potensiál mina-rai no gás ne’ebé deskobre ona.
“Ami hein atu fura posu adisionál sira iha rai-maran nune’e dezenvolve rezerva potensiál minarai no rezerva gás nian,” Christopher hatete.
Timor Resources ne’ebé harii iha tinan 2016, hanesan operadór iha bloku esplorasaun rua iha rai-maran Timor-Leste no halo parseria ho Timor Gap.
Entre 2021 to’o 2023, kompañia ne’e konsege fura posu esplorasaun tolu ho taxa susesu 100%, no deskobre ona potensiál signifikativu ba minarai no gás. Agora dadaun, esforsu avaliasaun sei kontinua, no planu fura posu foun rua mós prepara ona.
Reuniaun ne’e mos akompaña hosi eis-Ministra Negósiu Estranjeiru Austrália, Julie Bishop, ne’ebé agora servisu hanesan asesora ba Timor Resources.
PR Horta diskute tranzisaun ba dezenvolvimentu enerjia
Iha tempu hanesan, Prezidente Repúblika, José Ramos Horta, simu delegasaun Timor Resources iha Palásiu Prezidensiál Bairu-Pite atu diskute progresu no planu estratéjiku setór enerjia.
Diretór Jerente Interinu, Chris McCown hatete, diskusaun foka liu ba tranzisaun husi faze esplorasaun ba dezenvolvimentu rekursu naturál.
"Durante audiénsia ne'e reprezentante sira husi Timor Resources relata kona-ba susesu perfurasaun ba posu tolu iha rai maran, espresa kompromisu atu kontinua ho dezenvolvimentu ba fields sira ne'e, ho objetivu atu prodús mina no gás iha tempu badak," dehan Chris, ba jornalista sira, Kinta (16/04).
Nune'e inisiativa ne'e hein katak sei iha papél vitál ida hodi dudu dezenvolvimentu ekonómia lokál no infraestrutura.
Timor Resources konsidera katak dezenvolvimentu mina no gás iha rai-maran sei sai fator importante atu dudu kresimentu ekonómiku no garante rekursu enerjia soberanu ba Timor-Leste.
