Maske nia husik ona Timor-oan sira durante tinan lima nia laran, maibé nia memoria sei metin nafatin iha povu ne’e ninia hanoin.
Iha tinan ida ne’e, ho situasaun politika iha TL ne’ebé seidauk normal, Partidu Demokratiku husu ba lider sira Partidu Politiku sira atu ka’er nafatin prinsipiu Prezidente PD Saudosu La Sama nian hodi servi povu no nasaun ne’e.
“Ohin loron ida ne’ebé mak ami hotu no timor-oan halo reflesaun fali katak ita lakon ita-nia eroi ida, Fernando La Sama de Araujo, Partidu Demokratiku lakon nia Prezidente, ohin ami hakarak hotu-hotu, ita nafatin komunga prinsipiu ne’ebé nia husik hela ‘Ha’u-nia dignidade la aas liu dignidade Estadu ni’an,” dehan Prezidente PD Mariano Assanami Sabino, iha Sede PD, Kolmera, Sesta (05/06).
Assanami husi ba politiku no líder sira atu forsa hamutuk hodi fó esperansa nafatin ba povu no ba rai ida ne’e.
“Katak hotu-hotu tenke hamutuk par hakotu impase politika, hodi normaliza fila ekonómia no aselera dezenvolvimentu Timor-Leste nian ba oin”.
PD Nakloke ba Kritika
Aleinde ne’e, Prezidente Partidu Demokratiku Mariano Assanmi Sabino husu ba povu TL tomak atu tau-matan nafatin ba PD atu nune’e PD sai instrumentu politiku ne’ebé mak ka’er metin prinsipiu Demokratiku Timor-Leste.
Nia dehan, PD mós hamrik atu transforma sosiedade ne’e sai sosiedade demokratiku.
“Partidu Demokratiku konta ho imi, Partidu Demokratiku aliadu ho povu, Partidu Demokratiku hamutuk ho imi hodi la’o ba oin, estrutura Partidu Demokratiku hakarak hato’o deskulpa ba inan-aman no militantes, kuadru sira hotu, karik iha buat balun ne’ebé mak Partidu Demokratiku durante halo seidauk tuir saida ema hotu-hotu nia mehi, maibé lolo liman nafatin ba imi hotu, mai ita hamutuk haboot Partidu Demokratiku,” dehan Assanami.
Mariano afirma, sira ne’ebé fundador, kompaneiru sira ne’ebé haka’as iha kraik halo boot Partidu ne’e, partidu mantein husu nafatin kontribuisaaun, atu Partidu Demokratiku sei selebra, selebrasaun ida ne’ebé boot tebes tinan 19 Partidu nian, husi Estrutura Nasionás to’o baze hamutuk servisu maka’as nafatin hodi haforsa Partidu Demokratiku hodi konstrui ba ema hotu nia mehi.
