Diretór Jerál MSSI, Rui Manuel Exposto hatete, naran ne’ebé haruka ba suku ne’e bazeia ba lista ne’ebé haruka husi Ministériu Administrasaun Estatál.

Nia esplika, bainhira naran laiha xefe suku sira bele halo reklamasaun mai MSSI ho Estatál atu uza fali dadus ne’ebé haruka mai liu autoridade munisípiu hodi rezolve audisionál.

“Nune’e, ita kontinua la’o ho dadus ne’ebé iha atu realiza duni iha loron 9 fulan (loron tersa aban) ne’e no saida mak ita iha avansa, ita hein sei rezolve dadus sira ne’ebé laiha,” tenik Rui, iha servisu fatin, Kaikoli, Sesta (5/6).

Bainhira xefe suku sira simu lista kona-ba dadus uma kain ne’ebé aprovadu husi MSSI sira halo konfirma kedas ho lista ba sira-nia populasaun, maibé naran barak maka laiha, entretantu mosu preokupasaun barak husi xefe suku no xefe aldeia tanba dadus la kompletu no balun lista laiha.

Hanesan Xefe Suku Akadiru-hun, Juvinal da Conceição hatete, la satisfás ho MSSI nia servisu durante fulan rua nia-laran tanba populasaun balun laiha no balun suku seluk tama fali iha suku ne’e nian.

Tuir dadus ne’ebé iha, suku ne’e iha xefe família hamutuk 737 maibé lista ne’ebé mosu iha de’it 637.

"Dadus ne’ebé ha'u simu la bazeia ba dadus uma kain ne’ebé ami hatama no ha'u-nia dadus uma kain 88 pesoas lakon totál no iha ha'u-nia aldeia suku seluk nia naran mosu fali iha ha'u-nia suku” dehan nia.

Xefe suku ne’e mós informa bainhira dadus husi Suku Akadiru-hun ne’e mak la kompletu nia sei la simu osan ne’e atu fahe ba komunidade, hein to’o dadus kompletu maka foin simu osan atu fahe ba nia komunidade.  

Tuir orariu sei simu subsidiu termina ona iha loron tersa aban 9 fulan-Juñu 2020.

Apoiu monetáriu ne’e sei benefisia uma kain hamutuk 298.119 iha Munisipiu 12, la inklui REAOA-Oekusse.

Orsamentu ne’ebé transfere total hamutuk $99,623,800.00, ne’ebé koresponde ba pagamentu apoiu monetáriu uma kain ba fulan rua hamutuk $200.

Objetivu husi apoiu monetáriu ne’e, hodi garante sustenta família sira no apoiu lacuna despezas tanba situasaun Covid-19.

Husu ba uma kain sira atu kolabora ho ekipa pagamentu too fatin pagamentu iha aldeia no suku sira.

Aliende ne’e, husu mós ba entidade hotu atu kolabora kria pas, estabilidade no kumpri rekijitus ho lei sira iha prosesu pagamentu.