Portavoz Sentru Integradu Jestaun Krize (SIJK), Doutora Odete Viegas da Silva hatete, Ospital Referal Suai deteta kazu ida iha loron Domingo ne’e ho nia sintomas hanesan Covid-19.

Sintomas isin manas temperatura 39, me’ar, no kakorok moras.

Pasiente ne’e atende husi ekipa médika no admite ba fatin izolamentu hafoin ekipa laboratóriu foti amostra no ekipa vizilansia foti istoria no istoria ba kontaktu.

“Amostra ne’ebé maka foti transporta kedas mai Dili hodi halo teste no nia rezultadu hatudu negative,”dehan nia liuhusi konferensia imprensa iha CCD, ohin.

Nia esplika, loron 4 fulan-Juñu suspeitu ne’e ba konsulta iha ospital asesu ba sistema triajen nia kondisaun inus been no mear oituan maibé nia la temi istoria kontaktu tanba tauk.

Entaun iha loron Domingo ne’e nia ba konsulta tan fó sai nia istoria loloos katak pasiente ne’e negosiante ne’ebé hala’o servisu iha motamasin simu sasan hatun bus kareta no iha kontaktu ho ema Indonezia ne’ebé hodi sasan mai ne’e.

Tanba ne’e, hasai nia amostra no hasai mós ema ne’ebé kontaktu besik ho pasiente ne’e ema na’in 20 nia amostra no nia rezultadu negativu hotu.