Iha suku Komoro, aldeia 30 de Agosto, Vise-PM Armanda ho simbolikamente intrega osan $200 ba reprejentante benefisiariu sira hotu, la kumpri distansia sosial.

Ministra Solidariedade Sosial no Inkluzaun ne’e mós la uza maskra, tuir medidas Estadu Emerjénsia datoluk nian.

Enkuantu benefisiariu sira seluk mós tuir formatura ne’ebé hamrik besik malu, la uza maskra, no la fase liman.

Situasaun ne'e mos akontese iha Suku Fatuhada. Benefisiariu sira la kumpri regra Estadu Emerjensia. 

Benefisiariu balun halo protesta tanba sira nia laiha lista, maski sira laos komunidade foun iha suku ne’e.

Antes ne’e, Diretór Jerál MSSI, Rui Manuel Exposto hatete, naran hirak ne’ebé taka iha suku bazeia ba lista husi Ministériu Administrasaun Estatál (MAE). Nune’e, bainhira iha ema balun naran laiha bele halo reklamasaun ba governu.

Naran ne’ebé haruka ba suku ne’e bazeia ba lista ne’ebé haruka husi Ministériu Administrasaun Estatál.

Nia esplika, bainhira naran laiha xefe suku sira bele halo reklamasaun mai MSSI ho Estatál atu uza fali dadus ne’ebé haruka mai liu autoridade munisípiu hodi rezolve audisionál.

“Nune’e, ita kontinua la’o ho dadus ne’ebé iha atu realiza duni iha loron 9 fulan (loron ohin) ne’e no saida mak ita iha avansa, ita hein sei rezolve dadus sira ne’ebé laiha,” tenik Rui, foin lalais.

Bainhira xefe suku sira simu lista kona-ba dadus uma kain ne’ebé aprovadu husi MSSI sira halo konfirma kedas ho lista ba sira-nia populasaun, maibé naran barak maka laiha, entretantu mosu preokupasaun barak husi xefe suku no xefe aldeia tanba dadus la kompletu no balun lista laiha.

Objetivu husi apoiu monetáriu ne’e, hodi garante sustenta família sira no apoiu lacuna despezas tanba situasaun Covid-19.

Husu ba uma kain sira atu kolabora ho ekipa pagamentu too fatin pagamentu iha aldeia no suku sira.

Autoridade seguransa mantein fo seguransa iha sede suku sira, no situasaun hakmatek.  

Aliende ne’e, husu mós ba entidade hotu atu kolabora kria pas, estabilidade no kumpri rekijitus ho lei sira iha prosesu pagamentu.