“Atu prosesu pagamentu direita iha nivél suku ka uma kain sira iha teritóriu TL laran tomak FONGTIL destaka ninia membru sira iha terenu,”informa Diretór FONGTIL, Daniel Santos do Carmo ba jornalista sira iha Sentru Informasaun Covid-19, iha salaun FONGTIL Kaikoli, Sexta (05/06).
Nia dehan, FONGTIL nia membru 49 maka sei monitória prosesu pagamentu subsidiu iha munisipiu Dili tomak, postu Atauro, Metinaro no kobre hamutuk suku 36.
FONGTIL mós kolabora ho KAK hodi “hafuhu tuir” ekipa ne’ebé halo pagamentu fundus Covid-19 durante prosesu pagamentu.
Atu nunee, bainhira FONGTIL dekteta kazu ruma akontese deskonfia korrupsaun, koluzaun no nepotizmu sei envia direita ba KAK atu loke investigasaun juridiku.
Nune’e FONGTIL enkoraza populasaun ne’ebé sente katak durante pagamentu la hetan direitu tanba fixa familia hetan eleminadu husi Ministériu Administrasaun Estatal no MSSI nafatin halo reklamasaun ba meja reklamasaun iha suku nune’e bele hetan esplikasaun husi ekipa ka hetan konsiderasaun ba direitu ne’e.
FONGTIL apela ba populasaun atu subsidiu ne’ebé governu fó ne’e útiliza ba kompleta nesesidade konsumu iha uma kain.
Diretór Daniel husu ba benefisiariu sira atu evita fó osan ba ekipa pagamentu iha suku. Tanba subsidiu ne’e relasióna ho pandémia COVID 19.
Konsideradu hanesan pandémia tanba afeita ka da’et ba umanidade tomak iha mundial, balun infetadu direita husi virus ida ne’e, barak mós sofre konxikuensia sosiu ekonómia husi kazu ida ne’e ninia klamidade.
FONGTIL apresia esforsu governu nian hodi hamosu pakote ekonómia oi-oin nu’udar resposta ba impkatu sosiu ekonómia, tanba TL iha poténsia ba redusaun produsaun agrikula no uma kain sira depedensia ne’e lakon empregu no taka negósiu.
Apoiu osan ba agregadu familia sira iha âmbitu pandémia COVID 19 haktuir ba dekretu lei númeru 15/2020 nu’udar meius importante atu insentiva kapasidade kompra familia nian durante implementasaun estadu emerjénsia.
Maske apoiu ida ne’e kuaze la’o atrazu tanba problema tékniku ligasaun ho dadus uma kain ne’ebé hamosu konfuzaun iha públiku. Atu evita mosu iregularidade ka violasaun ba dekretu lei númeru 15/2020.
FONGTIL louva tebes servisu ne’ebé MSSI halo iha ne’ebé fó karta dispozisaun ho númeru 26/ETFC-19-MSSI Maiu 2020.
Ho objetivu atu solisita atu monitóriza implementasaun pagamentu apoiu umanitáriu ba agregadu familia, bazeia ba baze legal ida ne’e FONGTIL estabele ekipa sosiédade sivil ida hodi tau matan ba distribuisaun osan ba agregadu familia iha 12 inklui RAEOA ho objetivu atu garante prosesu distribuisaun osan refere la’o iha âmbitu transparénsia, akuntabilidade no hado’ok ita nia ekipa pagamentu suku sira husi aktu korrupsaun, koluzasaun no nepotizmu.
Orsamentu ba kombate surtu Covid-19 iha Timor-Leste hamutuk millaun $150.
