Rezultadu eleisaun lejizlativa divulga sai ona. Apuramentu nasionál iha Sekretariadu Tékniku Administrasaun Eleitorál (STAE) remata iha iha Segunda (24/7) madrugada.

Rezultadu ne’e indika partidu lima mak sei ‘borus’ ba Uma Fukun Parlamentu Nasionál hanesan partidu Frente Revolusionáriu Timor-Leste Independente (FRETILIN), partidu Congresso Nacional Reconstrução Timor-Leste (CNRT), Partidu Libertasaun Populár (PLP), Partidu Demokrátiku (PD) no partidu Klibur Haburas Unidade Nasionál Timor-Oan (KHUNTO).

Kontajen ne’ebé halo hatudu hela ba FRETILIN nu’udar partidu mais votadu ho totál votu 168.422 (29,65%). Ida ne’e kompara ho tinan 2012 la hatudu mudansa signifikante, tanba hetan mudansa uitoan husi vírgula. Maski nune’e, hatudu mudansa balun iha Parlamentu Nasionál. Partidu FRETILIN la konsege defende kadeira iha períodu liubá ne’ebé hetan kadeira 25, tanba agora tuun ba kadeira 23.

Oin seluk ho partidu CNRT, rezultadu ne’e nu’udar ‘derrota’ boot. Partidu ne’ebé konsege manan períodu rua tuituir malu no kaer ukun iha tinan sanulu nia laran. Dadus ikus liu iha tinan 2012 partidu ne’e hetan 36,66%, maibé iha tinan ne’e 29,46% ka tuun 7.21%.

Husi mudansa hirak ne’e hatudu implikasaun boot ba Parlamentu Nasionál. Iha tinan 2012 hetan kadeira to’o 30, maibé iha períodu ne’e tuun ba kadeira 22 ka lakon kadeira 8. Partidu Demokrátiku mós lakon. Husi kadeira 8 iha 2012 tuun ba kadeira 7 iha períodu ne’e.

Partidu sira ne’ebé sai ‘manan-na’in’ iha eventu demokrasia ne’e maka partidu foun rua Partidu Libertasaun Populár (PLP) no partidu KHUNTO. Partidu foun ne’e konsege hamihis kadeira partidu boot rua nian. Kadeira hamutuk 13 mak sira haknauk. Númeru ne’e la inklui mós kadeira rua husi Frente Mudansa nian.

Povu ezerse duni ninia direitu ho di'ak. Konsege duni eskolla sira ninia reprezentante ba Parlamentu Nasionál no governu tuir duni sira ninia hakarak iha situasaun ne’ebé nakonu ho pás no estabilidade. Maski la halakon espetativa oi-oin ne’ebé durante ne’e mosu, maibé sira re-afirma pozisaun hodi fó ‘kastigu’ ba partidu sira balun.

Ne’e hatudu katak, povu hahú matenek. Sira hatene sé mak sira atu fó fiar no fiar ne’ebé sira fó durante tinan lima nia laran konsege ezekuta ho di’ak ka lae? Ida ne’e mak sai sasukat ida ba sira hodi determina futuru Timor-Leste nian iha kada tinan lima. PARABENS BA POVU TIMOR-LESTE.