Tuir karta ne’ebé envia ba DNTT, iha loron 6 Dezembru 2018, ne’ebé asina husi arguida LVA, husu autorizasaun atu bele utiliza karreta estadu tipu Toyota ho xapa matríkula 06-378 G no Toyota Rush ho xapa matríkula 06-377 G ba Kupang-Indonézia hodi halo servisu.
“Atu hodi apoiu atividade servisu instituisaun Conselho de Imprensa nian iha Kupang-Indonézia, maka ami presiza tebes ita boot nia tulun bele fó apoiu urjente hodi fasilita hela prosesu ida ne’e”, haktuir iha karta ne’e.
Tuir karta pedidu ne’e, iha loron 12 Dezembru 2018 DNTT vistu aprovasaun ba karreta tipu Toyota ho xapa matríkula 06-378 G ho validasaun to’o 20 Dezembru 2018.
Loron ida antes aprovasaun husi DNTT nian ka iha loron 11 Dezembru 2018, Embaixada Indonézia iha Dili, hasai karta lisensa lori veíkulu ba karreta ho tipu Toyota xapa matríkula 06-378 G hodi halo viajen servisu ba Kupang-Indonézia iha loron 11 Dezembru 2018 to’o 15 Dezembru 2018.
Nune’e, iha formuláriu uzu patrimóniu KI nian ne’ebé prienxe, arguida LVA husu atu uza karreta Estadu ho xapa matríkula 06-378 G ba períodu utilizasaun husi 11-19 Dezembru 2018, ho objetivu viajen privadu lori oan ba konsulta no hetan aprovasaun husi arguida ATS.
Karta seluk ne’ebé arguida LVA haruka ba dirijente KI, iha loron 10 Dezembru 2018, arguida LVA delega kompeténsia servisu ba funsionáriu KI seluk. Iha karta ne’e rasik, arguida husu lisensa médiku hodi lori oan ba konsulta iha Kupang-Indonézia.
“Ha'u sei lisensa médiku lori ha'u nia oan ba konsulta iha Indonézia, komesa husi loron (11 Dezembru 2018 to’o 14 Dezembru 2018 no sei tama fali servisu iha 17 Dezembru 2018,” deklara arguida ne’e iha ninia karta delegasaun servisu.
“Ami ba Kupang servisu urjente, maibé karta despaxu laiha, oralmente mak iha” dehan nia, julgamentu primeiru interrogatóriu, iha Tribunál Distritál Dili (TDD), horisehik.
Maski iha karta ba KI, arguida LVA husu lisensa lori oan ba konsulta iha Kupang, maibé tuir ninia deklarasaun iha Tribunál katak, nia ba halo viajen servisu iha Kupang.
“Ami uza karreta ba Kupang ne’e objetivu prinsipál mak ba halo servisu, maibé ha’u nia oan mós momentu ne'ebá moras, entaun ha’u lori nia ba ospitál halo tratamentu”, dehan nia iha Tribunál. Tuir arguida LVA, ninia viajen ba Kupang-Indonézia atu atende semináriu jornalizmu, maibé nia rasik mós la hatene semináriu ne’e ko'alia kona-ba saida.
Nia hatutan, konsege partisipa duni iha semináriu ne’e maibé la remata tanba tenke lori ninia oan moras ba ospitál.
Arguida LVA hatutan, nia halo viajen servisu ba Indonézia hodi partisipa semináriu ida iha Kupang, maibé arguida seluk ho inisiál ATS tuir nia ba Kupang atu halo servisu saida nia rasik mós la hatene, tanba laiha koordenasaun durante iha dalan.
Entretantu, tuir karta husi arguida ATS, iha loron 7 Dezembru 2018, delega kompeténsia servisu ba funsionáriu sira seluk tanba foti lisensa anuál hahú husi loron 10 Dezembru 2018 to’o 14 Dezembru 2018.
Entretantu, tuir deklarasaun sasin JP ba tribunál katak, bainhira funsionáriu ida atu uza karreta estadu ba halo servisu partikulár ka servisu Estadu presiza iha karta autorizasaun husi Diretór Ezekutivu no mós parte Lojístika hodi haree kondisaun karreta nia hafoin bele uza.
“Kazu sira nian ne’e laiha karta pedidu, maibé tuir karta ne’ebé mak iha ne’e asuntu servisu no ida fali privadu”, dehan nia.
Nia dehan, regra iha Konsellu Imprensa bainhira karta ruma husi estranjeiru atu tuir seminariu ka iha rai laran, presiza halo diskusaun plenária hafoin deside hodi dezloka ema.
Maibé, ba viajen arguida sira nian, tuir sasin, Konsellu Imprensa la hetan karta konvite ruma, nune’e la hetan autorizasaun husi konselleiru KI nian hodi delega funsionáriu ruma atu ba halo viajen servisu iha Kupang-Indonézia, iha momentu ne’ebá. Ministériu Públiku (MP) akuza LVA no ATS envolve krime oin rua, pekulatu-de-uzu ne’ebé previstu iha artigu 296 no abuzu podér iha artigu 297.
Tuir Prokuradór Adérito Tilman, arguida sira uza kompeténsia hodi viola lei no utiliza patrimóniu Estadu nian ba interese privadu.
Entretantu, advogada privadu husi arguida LVA no ATS, Elda Gomes no Cesaltina Afonso, seidauk bele fó informasaun ba públiku tanba prosesu julgamentu sei kontinua ba semana oin. Hafoin rona deklarasaun husi arguida no sasin, tribunál deside hodi adia julgamentu ba loron 25 Jullu 2019.
Prosesu julgamentu ne’e prezide husi Juis Singulár, Yudi Pamungkas, Ministériu Públiku reprezenta husi Adérito Tilman, no arguidu sira hetan asisténsia legál husi advogadu privadu Elda Gomes no Cesaltina Afonso.
