Iha karta petisaun ne’e, povu Oekusse husu mós atu parte kompetente sira extende mandate atual Prezidente Autoridade RAEOA-ZEESM, Mari Alkatiri.
Prezidente PN Arão Noe hatete, nia parte simu karta petisaun ne’ebé asina husi ema na’in 101 resin.
“Sim, petisaun povu Oekusse ha’u mak simu, ema 101 resin mak asina. Ne’e direitu sidadaun ida nian halo petisaun. PN mak reprezentante povu, agora halo petisaun ida mai hodi halo saida ne’e konstitusaun fó dalan no rejimentu mós fó dalan,” dehan nia iha PN, Segudan (15/07).
Hafoin simu petisaun ne’e, Arão dehan, meza PN sei baixa ba Komisaun A atu bele halo pareser.
Maibé, nia garante katak, petisaun ne’e sei la fó impaktu ba alterasaun lei ZEESM ne’ebé daudauk ne’e iha Prezidente Repúblika nia liman.
Kona-ba extende mandatu Prezidente Autoridade ZEESM, nia dehan, ne’e kompetensia governu nian no PN lakohi atu interfere.
“Karik to’o loron tolu fulan Agustu mak Prezidente Republika seidauk promulga lei ne’e rasik oinsa mandatu Mari (Alkatiri) ida ne’e kabe ba Primeiru Ministru nia kompetensia. Ami koalia kona-ba parte legal de’it, extende ka lae ne’e imi ba husu Primeiru Ministru”.
Entretantu, iha loron hanesan, Antonio Lelan ne’ebé deklara nu’udar reprejentante Liurai, Na’i Juf Dato, Lia-nain, Intelektual, Juventude, Sosiedade Sivíl, Setór Privadu no entidade hotu iha RAEOA, hato’o mós karta petisaun ba Prezidente Repúblika Francisco Guterres Lu Olo.
“Ami husu ba Prezidente Republika Francisco Guterres Lu Olo, no entidades hotu iha Timor Leste inklui Partidu Politiku sira atu tuur hamutuk no husu PN atu revoga Dekretu PN ne´ebé altera lei nú. 3/2014, 18 Juñu,” dehan nia iha Palasiu Prezidensiál, Bairru-Pité, Sesta (12/7).
Nia hatutan, povu Oekusse hakarak atu Mari Alkatiri kontinua kaer kargu nu’udar Prezidente Autoridade RAEOA tanba serbisu ne’ebé nia halo fó duni benefisiu ba povu Oekusse.
“Ami, povu Oekuse hakarak Mari Alkairi atu kaer nafatin kargu Prezidente Autoridade RAEOA no ZEESM, tanba realidade hatudu momoos katak rezultadu iha tinan haat nia laran benefisia duni Povu Atoni Oekuse Ambeno no Timor Leste,” dehan nia.
