Hanesan públiku hatene, mandatu atual Prezidente Autoridade RAEOA-ZEESM Mari Alkatiri sei retama iha 30 Jullu oin mai.

“Ami (governu) seidauk haree (figura) ba ida ne’e (troka Alkatiri) no desizaun seidauk iha,” deklara PM Taur hafoin hasoru-malu ho Prezidente Repúblika Francisco Guterres Lu Olo iha Palasiu Prezidensiál, Bairro-Pité, Kinta (11/07).

Iha loron hirak liu ba, Parlamentu Nasionál ho forsa maioria konsege aprova alterasaun lei RAEOA-ZEESM ne’ebé fó poder boot liu ba governu hodi fihir no fó pose ba Prezidente Autoridade RAEOA.

Ba ida ne’e, PM Taur dehan, alterasaun lei ne'e sei haruka mai iha Prezidente Repúblika atu promulga.

Iha fatin ketak, Diretór Forum Organizasaun Naun-governamental Timor Leste (FONGTIL) Daniel dos Santos Carmo hatete, ema ne’ebé atu subtitui Mari Alkatiri iha Oekusse tenke iha jestaun ne’ebé di’ak no professional, hetan apoiu politika no lei hodi bele hala’o serbisu ho di’ak no forte.

Maibé, nia dehan, la signifika katak ema ne’e tenke mastradu ka ema tenke husi partidu A ka B.

“La signifika ema mastradu ida hatene jestaun ou partidaria atu jere dezenvolvimentu. Ha’u-nia  partidu mak ukun ha’u haruka ha’u-nia ema ba ho intensaun fahe de’it previlejiu ida ba ukun, ne’e la loos, presiza boa-governasaun, efikasia, efisiensia,” dehan Daniel.