Prezidente PN Arão Noe hatete, PN halo pedidu orijensia nian atu bele konklui serbisu to’o iha 26 Jullu nune’e bele haruka ba Prezidente Repúblika atu halo apresiasaun.

“Tanba ita-nia kontituisaun mós fó tempu ba Prezidente Republika loron tolu nolu hodi halo apresiasaun, promulgasaun, veta,” dehan Arão iha PN, Segunda (15/07).

Tanba ne’e, nia dehan, PN hakarak atu halo debate orijensia hodi redus tempu debate normal hodi bele fasilita aprovasaun to’o periodu promulgasun.

“Ohin lider bankada mós halo apresiasaun ba kalendariu ida, to’o aprovasaun final global, submisaun ba Prezidente Republika hodi promulga, uma estadar ate dia 26 Jullu submete ba Prezidente Republika hodi halo apresiasaun no promulga.”

Iha fatin hanesan, proponente ba relatoriu ho karater orijensia, husi partidu CNRT Duarte Nunes dehan, sira propoin aprova iha 26 Jullu atu bele fó tempu ba PR hodi halo aprosimasaun.

“Ita foti 30 dias husi 30 Agustu signifika katak 31 Jullu ita tenke aprova ona iha ne’eba maibé ita mós hatene PR bele promulga ou veta,” dehan nia.

Iha fatin proponente husi partidu PLP Maria Angelina Lopes hatete, presija konta mós prazu legal ba kompetensia PR atu nune’e laiha emosaun atu obriga PR hala’o nia kompetensia ne’e la tuir prazu ne’ebe mak iha.

“Tenke konta mós katak ita-nia (PN) prazu prolongasaun ba ita-nia resesu ba 30 dias ho nune’e mak ami haree katak pedidu ida ne’e merese duni atu halo debate iha orijensia nia laran”.

Iha hanesan Prezidente Bankada FRETILIN Aniceto Gutures deklara, nia vota kontra proposta relatoriu ho karater orijensia tanba iha Sesta (12/07), Prezidente PN konvoka plenaria extra-ordinariu hodi baixa lei sira husi governu iha Sabadu no Domingu no obriga komisaun sira prepara kalendariu atu bele dudu lalais alterasaun lei sira ne’e.

“Alterasun lei sira ne’e seidauk loos hotu PN fó tiha tratamentu orijensia ba lei hirak ne’ebé mai husi governu maske laos PN nia insiativa,” dekla nia.

Deputadu ne’e kestiona tanba proposta alterasaun ba lei haat ne’e mai husi governu maibé deputadu sira mak husu fali ho karater orijensia.

“Pedidu hirak ne’e mak ohin ita mai konvoka etra-ordinaria ne’e agora deputadu sira halo tiha ona violasaun ba parlamentu nia rezimentu rasik artigu 97 númeru 2. Rezimentu parlamentu fó duni kbiit ba inisiativa atu halo prosesu orijensia kualker pojetu lei no rezolusaun ruma (maibé) pedidu tenke mai husi governu tanba prosposta lei hirak ne’e inisiativa husi governu nian,” nia afirma.