DILI: Konsellu Imprensa preokupa makaas ho atendimentu públiku nian ba jornalista sira tanba dala ruma la ho dignu.

DILI: Eleisaun Antesipada hela fulan balun de'it. Ne’e duni, Sekretariadu Tékniku Administrasaun Eleitorál (STAE) hahú semana oin hatama ona materiál sensitivu balun.

DILI: Projetu estrada diresaun Tibar to'o Gleno munisípiu Ermera no Tibar too Likisá remata ona, maibé manutensaun paradu tanba governu la halo pagamentu ba kompañia sira.

DILI: Uma kain hamutuk 20, iha Suku Babikina, Postu Administrativu Maubara, Munisípiu Likisá, hetan estragu hafoin udan boot, iha Kuarta (14/3), kalan.

Inés Serão, komunidade Suku Babikina ne’ebé nia uma hetan estragu hatete, udan ne’e hahú iha tuku hitu too fali tuku ualu no derrepente mota tun no lori hotu sasán uma laran.

“Ha’u nia sasán uma laran laiha ida mak atu salva. Ami hanoin udan hanesan baibain, tanba ne'e ami laiha preparasaun”, dehan nia, iha Suku Babikli, horisehik.

Iha fatin hanesan, vítima Virgínia Fátima hanesan mós hatete, sente triste tanba uma hetan estragu. Agora daudaun sira tenke buka fali fatin seluk hodi hela provizóriu, tanba sira nian uma laran nakonu ho tahu.

“Ami la konsege hasai ami nian sasán tanba derrepente de’it mota nakonu tiha ona. Ha’u salva de'it ha’u nia-oan na’in rua”, dehan nia.

La’ós de’it uma, maibé Kapela iha suku ne’e mós hetan estragu. Katekista Kapela, Emília Maria hateten, hafoin udan boot komunidade sira lalais salva estátua sira hodi ba rai fali iha uma, tanba kapela nakonu ho tahu, inklui meza no kadeira hetan estragu.

Hataan ba preokupasaun ne’e, administradór Postu Administrativu Maubara, Domingos Alves Correia hatete, husi akontesimentu ne’e, iha aldeia Morae hamutuk uma kain sanulu (10) mak sai vítima no Aldeia Delis-Uatu uma kain sanulu (10).

Autoridade lokál halo ona kontakta ho Ministériu Solidariedade Sosiál (MSS) hodi bele fó apoiu emerjénsia ba vítima sira.