"Liuhusi Resoluzaun Governu ikusliu, aprova iha 16 marsu 2020, no sei publika ohin, iha Jornal Repúblika, Governu Timor-Leste foti tan medidas importantes oioin, ho karáter temporáriu no estraordináriu, no balun mak ne’e, sidadaun estranjeiru ne’ebé iha semana haat nia laran liubá, hela ka liuhusi país afetadu ho coronavirus, tuir OMS fó-hatene, labele tama lai iha Timor-Leste,”deklarasaun PR Lú Olo ba jornalista, iha Palasiu Prezidensiál Bairu-Pite, Kinta (20/03).

Tuir nia katak, Primeiru-Ministru bele autoriza balun tama tuir kritériu iha rezolusaun ne’e kona-ba hatama merkadoria liuhusi portu ka aeroportu, sidadaun estranjeiru sira sei hela iha Zona Internasional, tuir Lei kona-ba Migrasaun no Azilu.

Nia dehan, sei asegura posibilidade halo evakuasaun médika urjente no aviaun hodi hatama ai-moruk no material hospitalár mai fó tulun ba TL. Nune'e sidadaun nasionál no sidadaun estranjeiru ne’ebé, tuir rezolusaun, bele tama iha Timor-Leste, tenke tama iha kuarentena.

Governu sei avalia fila fali medida sira ne’e fulan-fulan. Tanba ne'e saúde iha ema hotu nia liman espesialmente agora, ho ameasa husi moras foun ne’e, ema ida-idak tenke kolabora ho ekipa interministerial no ho Organizasaun Mundial Saúde, ne’ebé haka’as-an hela atu prevene moras ne’e tama no, karik tama, labele husik daet babeibeik husi ema ba ema.

"Ha’u hatene katak maluk barak preokupa bainhira rona rumor ka informsaun falsu, ne’ebé lao kahor malu ho lia loos, liuhusi media sosiál. Ha’u husu, atu ita hotu prepara ita-nia an, ho ulun malirin no organizadu, atu moras ne’e, karik tama, sei la hada’et babeibeik. Ita ida-idak tenki hatene saída mak atu halo, atu bele ajuda família no komunidade hadook-an husi moras aat ne’e. Ita hakarak proteje ita-nia an, ita-nia família, ita-nia komunidade no ita-nia país," haktuir nia.

Nune'e ema bele hadook-an liu husi fasi liman beibeik ho sabaun ka uza dezinfetante ruma, hanesan álkol, labele kaer bebeik ita-nia oin, karik ita la fase uluk.