DILI: Presidente Repúblika (PR) lori ona diploma Parlamentu Nasionál (PN) kona-ba Dotasaun Orsamentu Temporaria (DOT) ba Tribunál Rekursu (TR) atu halo fiskalizasaun preventiva no abstratu.

DILI:Primeiru Ministru Taur Matan Ruak lamenta rezignasaun Xanana Gusmão husi lista kandidatu membru VIII Governu Konstitusional, tanba falta ona ema esperensia iha Governu foun ne’e.

Primeiru Ministru Taur Matan Ruak, Kinta-feira ne’e hala’o enkontru semananal ba semana dahuluk fulan Agostu nian hodi informa atividade Governu nian.

Nu’udar Xefe Governu, Taur lamenta rezignasaun ne’e, maske nune’e PM Taur respeita desizaun Xanana nian, no sei fó apoiu tomak ba Xanana ne’ebé atu konsentra ba halo negosiasaun fronteira rai no tasi ho Indonézia no kadoras greater sunrise.

“Hanesan Primeiru-Ministru lamenta tanba ema esperiente ida maka falta iha ha’u-nia Governu mais, ha’u respeita nia desizaun, ita apoiu tomak tanba Maun Xanana sei konsentra liu ba fronteira terrestre, máritima no negosiasaun ne’ebé sei halo ho Indonézia no Greater Sunrise ne’ebé sei halo ho kompañia sira Joint venture,” dehan Xefe Governu ba jornalista sira.

Maski nune’e, Xefe Governu ne’e konsidera rezignasaun Xanana nu’udar lisaun hodi fó fatin ba jerasaun seluk atu aprende no atu hateten katak Nasaun ne’e la depende ba ema ida. Maske iha liur Xanana sei fó apoiu nafatin ba Governu ida ne’e.