Kondutór Bus Berlaka, Diresaun Manufahi-Dili Martinho Sarmento hatete, antes ne’e Bus halai husi Manufahi mai Dili pasajeiru na’in ida seluk U$9 Dollar Amerikanu, maibé iha Estadu Emerjensia ne’e kada ema selu U$15 tanba tula pasajeiru masimu ema na’in 10 de’it.
“Ami tula pasazeiru husi na’in 5 to’o 10 de’it, ema ida selu U$9 de’it halai husi Dili to’o Same, entaun ami atu halo hatama osan ba patraun ne’e oinsá, ense mina, karik karreta aat ruma ami konta hotu ida ne’e entaun ami deside folin hanesan ne’e,” dehan nia, iha Terminal Taibesi, horisehik.
Kondutor ne’e dehan, iha situsaun hanesan ne’e Bus halai bele ajuda tula produtu lokal husi munisipiu mai nasional, maibé tula de’it, ema na’in 10 mai kraik, depois DNTT obriga tenke selu nafatin tuir situasaun normal nian entaun diak liu karreta para de’it.
Entertantu hatan ba kestaun ne’e, Diretór Nasionál Transporte Terrestre (DNTT), Natalino de Rosario hatete, Bus diresaun Lospalos mai Dili antes ne’e selu U$8 maibé sa’e ba U$15 ne’e parte DNTT sei halo intervensaun.
Tuir despaisu legál governu nian ne’ebé iha Dili-Lopalos U$8, Manufahi-Dili U$9 maibé derepennte tarefa sa’e DNTT sei koordena ho Polisia Nasionál Timor-Leste (PNTL), no Tranzitu tuun direita ba terrenu hodi halo pasa revista ba Transporte Públiku ne’ebé hasa’e tarefa ne’e.
“Ami seidauk simu reklamasaun pasazeiru husi Lautem no Manufahi ne’ebé kada ema ida selu U$15 dollar,” dehan nia, iha DNTT, hoirsehik.
Tuir informasaun ne’ebé Diairiu INDEPENDENTE hetan iha terenu katak, Karreta Angguna Diresaun Maubisse mai Dili antes ne’e ema na’in ida selu U$3 dollar, maibé agora daudaun hasa’e sa’e ona ba U$5 dollar.
