Tuir nia, rejimentu PN no konstituisaun la fó dalan ba vise Prezidente PN atu dirije plenaria bainhira Prezidente PN la delega kompetensia ba sira.
“Ha’u fiar katak sira sei la halo ida ne’e, sa tan sira na’in rua ema ne’ebé foun hela, ba nia kareira politika sei naruk, ha’u fiar katak sira sei la monu ba lasu sira hanesan ne’e,” dehan nia.
Patrocinio dehan, iha tentativa atu dudu Vise Prezidente PN na’in rua atu ajenda rekerimentu destituisaun meza PN.
“Artigu ida kolia kona-ba vise (Prezidente PN) sira iha kompetensia tolu de’it, maibé kompetensia sira ne’e Prezidente Parlamentu mak bele fó kompetensia ba sira, maibé (bainhira) laiha auzensia, (maibé) Prezidente Parlamentu iha ne’e, Vise sira laiha kompetensia atu dirije plenaria,” nia hatutan.
Maske fiar katak Vise PN na’in 2 sei la halo, maibé nia dehan, bainhira halo duni, signifika sira halo asaltu ba poder.
Iha fatin ketak, Vise Prezidente PN Maria Angelina Sarmento hatete, loloos Prezidente PN ajenda rekerimentu destituisaun atu deputadu sira bele diskuti no halo votasaun.
Maibé, nia hatutan, maske prazu loron lima ona, laiha sinal ruma ne’ebé hatudu katak Prezidente PN sei halo ajenda.
“Artigu 16 B kona- ba destituisaun bá prezidente Parlamentu Nasionál ne'e bainhira deputadu sira hatama pedidu destituisaun ba gabinete prezidente Parlamentu Nasionál, ho kedas husi ne'e sura to'o loron lima, katak dias utes ka loron serbisu nian, la konta hoSsabadu-Domingu. Loron lima ona obrigatoriamente prezidente Parlamentu Nasionál tenke tau ona ajenda hodi konvoka plenaria par deputadu sira debate hodi halo votasaun ba pedidu destituisaun prezidente Parlamentu Nasionál nian,” dehan nia.
Durante Loron lima ne'e prazu hotu iha ohin maibé seidauk iha sinal ruma ne'ebé Hatudu katak, prezidente sei halo ajendamentu destituisaun ba Prezidente Parlamentu Nasionál nian ne'ebé deputadu tolu nulu resin tolu(33), hatudu maioria ona asina hodi hatama rekerimentu ida ne'e katak deputadu maioria ne'e lakon fiar ona ba Prezidente Parlamentu Nasionál atu hala'o nia knaar nu'udar prezidente Parlamentu Nasionál",nia dehan.
Nia dehan, loloos Prezidente PN tenke hatudu responsabilidade politikamente no moralmente hodi tau ba ajenda rekerimentu destituisaun.
“Prezidente Parlamentu ne'e povu la hili direita maibé deputadu sira iha Parlamentu Nasionál mak hili, entaun bainhira deputadu sira lakon fiar ona, la depozita konfiansa ba nia í hakarak retira konfiansa ida ne'e, kuandu priense rekizitus maioria, sira bele aprezenta destituisaun,” dehan nia.
