Nia hatete, iha Segunda (11/05) loraik, bankada tolu haruka tan pedidu ida ho insiste obrigatoriamente bazeia ba artigu 16-B rejimentu PN.

“Pedidu ne’ebé haruka ba tán atu husu no insiste Prezidente atu tau ba ajenda ba destituisaun meza Parlamentu Nasionál prazu loron lima,” dehan nia.

Tuir nia, Prezidente PN tenke ajenda rekerimentu destituisaun hodi bele diskuti, no bainhira desizaun plenaria mak kontra konstituisaun Prezidente PN bele lori ba Tribunal Rekursu hodi anula desizaun refere.

“Iha rejimentu Parlamentu 1/5 deputadu aprezenta substitusaun, mais ida ne’e 36 deputadus, hatudu maioria absoluta deputadu sira ne’ebé durante fulan rua buka malu asina plata tun-sae, (agora) ne’e maioria ona, ne’e Prezidente halai la biban, laiha razaun, Prezidente lalika halai ida, assume reponsabilidade,” dehan nia.

Nia dehan, Prezidente PN lalika buka razaun hodi defende an, tanba bainhira defende an signifika nia halai ona husi ninia responsabilidade.

Bainhira Prezidente PN la tau iha ajenda, Vasconcelhos hatete, Bankada tolu sei haruka Vise Prezidente PN hodi dirije plenaria.

“Ita hein loron plenaria nian tuir artigu 14 rejimentu Parlamentu nian, Prezidente Parlamentu la delega, tanba sa? nia la falta, la delega ne’e katak nia iha impedimentu, nia labele tuur nonok iha nia gabinete, katak ha’u iha ne’e hela, ha’u la fó ba ema ida,” dehan nia.

Nia hatutan, PN la depende ba ema ida, maibé PN depende ba plenaria, tan ne’e see mak assume Prezidente Parlamentu assume responsabilidade.