Items filtered by date: Kinta, 26 Dezembru 2024

DILI: Amo Bispu Dioseze Baukau, Dom Leandro Maria Alves hatete, selebrasaun natál nu’udar festa ksolok nian, tan ne’e husu ema hotu atu labele rai odio ba malu, maibé kria paz no hatudu liman domin nian ba malu.

DILI: Arcesebispu Arkedioseze Metropolitana Dili, Dom Virgilio Caredeal do Carmo da Silva hatete, Maromak husik nia oan mai iha mundu la hanesan liurai ne’ebé ema hotu hadook aan, maibé Maromak haruka nia oan mai iha mundu hanesan ema kiik, atu nune’e ema hotu bele hakbesik aan bá.

DILI: Autoridade Protesaun Sivil servisu hamutuk ho Programa Aihan Mundial (WFP-Sigla Ingles), realiza ezersísiu simulasaun hodi hala'o koordenasaun no preparasaun ba dezastre naturais iha Timor-Leste.

Iha fulan ida ne'e, Governu Timor-Leste foti pasu importante ida, atu haforsa kapasidade resposta emerjénsia nian, no iha tempu krusiál, bainhira tempu udan hahú, no nasaun ida ne’e esperiénsia inundasaun no rai halai durante períodu ida ne’e iha tinan hirak liu ba.

Nune’e, husi loron 9 to’o 12 Dezembru, kuaze partisipante na’in 50 hosi instituisaun no organizasaun oioin halibur iha Same, Munisípiu Manufahi, hodi partisipa iha Ezersísiu Simulasaun Umanitária (SimEx), ne’ebé organiza hosi Autoridade Protesaun Sivil (APC), iha parseria ho Programa Ai-han Mundiál (PAM) no hetan apoiu hosi Servisu ba Asisténsia Umanitária hosi Ajénsia Estadus Unidus nian ba Dezenvolvimentu Internasionál (USAID).

“Ezersísiu ida-ne'e ajuda mantein koordenasaun foti desizaun ne'ebé lalais no efetivu no hametin ami nia Sistema Alerta Antesipada. Apoiu husi USAID importante tebes hodi asegura katak ita-nia nasaun nia kapasidade preparasaun no resposta aumenta,” dehan Prezidente Autoridade Protesaun Sivil, Jesuino dos Reis Matos Carvalho, liu husi Komunikadu ne’ebé Online INDEPENDENTE asesu, kinta ne'e (26/12/24).

Durante loron tolu nia laran, partisipante sira iha nível nasionál no hosi munisípiu Baucau, Lautem, Manufahi, Oecusse, no Viqueque, hetan formasaun no abilidade iha resposta lojístika emerjénsia no jestaun kadeia de valor durante krize no dezastre naturál sira. Aleinde ne’e, partisipante sira envolve iha ezersísiu prátiku sira ne'ebé simula senáriu reál no derepenti, hodi familiariza partisipante sira ho instrumentu, prosesu no prosedimentu nasionál sira ne'ebé eziste.

“Ha'u kontente tebes haree partisipante no fasilitadór na’in 80 liu hosi organizasaun oioin halibur hamutuk hodi treinu no pratika lojístika emerjénsia nian, promove koordenasaun multi-atór kolaborativu no hadi'a papél no responsabilidade sira hosi parte interesada oioin durante resposta emerjénsia sira," hateten Jacqueline de Groot, Reprezentante WFP iha Timor-Leste, durante ninia diskursu iha sesaun inaugurasaun.

Entretantu, SimEx hanesan ezersísiu operasionál ida ho eskala boot ne'ebé dezeña atu simula resposta lojístika emerjénsia nian, ne'ebé hala'o iha nasaun oioin iha mundu tomak, inklui Sri Lanka, Malawi, no Colombia. Iha Timor-Leste, partisipante sira elojia eventu ne’e tanba haburas koordenasaun ne’ebé forte, hadi’a prátika fahe informasaun, no hasa’e sira-nia abilidade atu responde ho efetivu liután ba nesesidade umanitária sira.