Durante enkontru entre Jacqueline de Groot ho Primeiru Ministru, introdús kona bá seguransa ai-han no nutrisaun, tanba WFP konsidera mál nutrisaun sai hanesan problema boot ida ne’ebé provoka raes badak iha Timor-Leste kuaze 47%.
“Nune’e, WFP hamutuk ho Governu liu-liu Ministériu Solidariedade Sosiál no Inkluzaun, Ministériu Edukasaun no Ministériu Saúde oinsá kombate mál nutrisaun iha TL,” dehan Jacqueline de Groot liu husi komunikadu ne’ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Tersa ne’e (11/03/25).
Reprezentante WFP subliña, asaun atu kombate mál nutrisaun la’ós de’it foku bá labarik sira maibé haree mós bá inan isin-rua no inan fó susu sira.
Governu ho WFP sei fó importánsia atu fó apoiu bá populasaun agrikultór sira, atu prodús barak liu-tán, hodi transforma produtu sira ne’e bá merenda eskolár hodi fó ai-han ne’ebé saudável bá labarik sira iha eskola.
Iha okaziaun ne’e, Primeiru-Ministru hato’o bem-vindu bá WFP no hatudu prontidaun atu servisu hamutuk bá povu Timor nia di’ak.
