Iha 10 Marsu, horseik, reprezentante komunidade husi suku tolu lori karta husu klarifikasaun nian ba Ministériu Obras Públika (MOP), Ministériu Administrasaun Estatal (MAE), Ministériu Justisa (MJ), Providoria Direitus Humanus no Justisa (PDHJ), Primeiru Ministru (PM), Parlamentu Nasionál (PN) no Prezidente Repúblika (PR).
"Ami hato'o karta ne'e ba Governu atu husu klarifikasaun klaru hodi responde ba komunidade sira-nia ezijensia,” informa portavoz komunidade afetadu, José Maria Ximenes, via WhatsApp, Segunda (10/03).
Portavos ne’e dehan, tuir loloos Governu tenke halo sosializasaun uluk ba lei atu komunidade sira bele atende ba prosesu sira hanesan ne'e, molok ba sukat no sobu uma.
Enkuantu, tuir karta husi komunidade afetadu ne’ebé Jornal INDEPENDENTE asesu, husu informasaun ba institusaun estadu sira kona-ba markasaun alargamentu estrada husi ponte Maufelu to'o ponte terminal Bekora, ne'ebé afeta propriedade privadu.
Komunidade sira hakarak hatene detailu projetu estrada ne'ebé mak sei alarga, iha área ne'ebé mak sei afeta iha periodu implementasaun, no lista proprietariu rai afetadu hodi husu klasifikasaun kona-ba proprietariu no área afetadu ho medida ezata.
Kona-ba kriteria indemnizasaun, komunidade sira mós husu métodu ka kriteriu ida ne'ebé MOP uza atu determina kompensasaun ba proprietariu sira.
Iha karta ne’e husu mós kona-ba valór indemnizasaun justu, katak montante ho baze hodi halo pagamentu ne'ebé proprietariu sira sei afeta.
Iha karta ne’e informa mós kona-ba pesoál husi ekipa tekníku MOP ne’ebé ameasa no fó presaun ba komunidade afetadu sira.
"Ami komunika ba ita-boot sira atu tau atensaun ba asuntu ne'e, tanba konsidera hanesan aktu krime. Ami hein katak ita-boot sira fó asesu ba informasaun relevante, no orientasaun kona-ba prosedimentu sira. Ami prontu atu halibur hikas atu diskuti liu tan kona-ba nia impaktu sira ne'e,” deklara komunidade sira iha karta ne’e.
