Orsamentu ne'e finansia ba programa tolu hanesan, programa Governu Rona, Haree Rasik no Advertorial, ne'ebé SEKomS halo ona kooperasaun ho média sira liu akordu ne'ebé asina ona.
Sekretáriu Estadu Komunikasaun Sosiál Expedito Loro Dias Ximenes hatete, SEKomS reprezenta IX Governu Konstitusionál asina kooperasaun ho media plataforma 12, ho objetivu media sira habelar informasaun ba asaun governativa governu nian no mos atividade sosial komunidade nian ba iha publiku liu husi meius komunikasaun sosial ne'ebé iha.
"Tanba iha 2025 iha redusaun ba orsamnetu hotu-hotu nune'e ita nia akordu kooperasaun ne'e mós redusaun liuliu iha programa tolu ne'ebé prinsipal ne'ebé ohin ita asina mak Governu Rona, Haree Rasik no publisidade sira hanesan advertajem," dehan Sekretáriu Estadu ba Jornalista sira iha Salaun PCM, Tersa (11/03).
Governante ne'e hatutan, husi programa tolu ne’e, ba programa Governu Rona ne'e ba media konvensionais sira, haree Rasik sei produs rasik husi SEKomS hafoin fó ba media sira ne'ebé iha kooperasaun ho SEKomS atu hatun.
SEKomS afirma, kooperasaun ne'e marka tan pasu importante ida ba governu, tanba bele servisu hamutuk nafatin media plataforma dijital no online sira hotu.
"Maske governu halo kooperasaun ida ne'e, maibé governu la iha intensaun atu interven ita boot sira nia politika editorial, tanba politika editorial nafatin depende ba media nia politika editorial,”dehan SEKomS.
Governante ne’e husu ba media sira atu bainhira atu hatun notisia tenki respeita nafatin Kode etika jornalismu nia no bainhira atu fó sai notisia tenki halo konfirmasaun didiak ka cek and ricek no presiza halo investigasaun.
Entertantu, media plataforma dijital ne'ebé asina akordu ho SEKomS mak, Grupu media Nasional (GMN), SmNews, SAPNews, Hatutan.Com, Lafaek News, Media Mudansa, VIP-TV, Lian Orluli, Guardamor, Media ONE Timor,Televizaun Edukasaun Timor no Ajensia TATOLI,IP.
Enkuantu, akordu kooperasaun sei realiza durante tinan ida nia laran.
Rekorda katak, molok ne'e, SEKomS mos asina ona akordu ho media imprime lima hodi distribui jornal ba munisipiu sira, la inklui RAEOA.
