Tanba ne’e, Primeiru-Ministru apela bá emprezáriu Timor-oan sira atu kontribui bá dezenvolvimentu nasaun ne’e ho laran tomak.

Maski nune’e, PM Xanana observa katak, emprezáriu Timor-oan balun liu-liu sira ne’ebé hetan projetu hosi Governu buka de’it atu hetan osan boot maibé servisu la ho kualidade to’o balun abandona projetu.

“Husu ba imi (Setor Privadu) atu halo diak, saida mak hakarak kontribui tenke halo duni no halo ho didiak ba konstrusaun Estadu ida-ne’e,” Dehan PM Xanana iha enkontru ho Emprezáriu nasionál sira ne’ebé organiza hosi Ministeriu Obras Publika iha Salaun Delta Nova, kinta (27/02/2025).

Xefe Governu, kontente ohin bele halibur-malu atu haree bá Estadu ne’e la’o di’ak ka la’e, haree fila-fali seitór privadu ho Governu koopera ho di’ak ka la’e tanba konstrusaun nasaun ne’e katak hakbiit sosiedade no hakbiit seitór privadu.

“Setor privadu ne’e importante, tanba nia mak kria mós empregu ba sidadaun sira hodi ajuda Estadu ida-ne’e,” Nia afirma.

Nune’e, apela bá emprezáriu sira atu kontinua kapasita-aan, kontinua dezenvolve-an hodi kontribui di’ak liu tán dezenvolvimentu nasaun ni’an.

Iha fatin hanesan, Ministru Obras Públika (MOP), Samuel Marçal fó atensaun bá emprezáriu sira atu servisu ho laran bá rai ida-ne’e tanba Governu halo ona planu oioin, maibé setór privadu tenke forte hodi bele kontribui no mós loke kampu traballu bá joven sira.

Husu bá seitór privadu hotu-hotu katak, sai emprezáriu la’ós hanoin de’it atu iha osan barak, maibé primeiru maka oinsa iha vontade servisu no tinan ida-ne’e ba oin MOP sei haree hodi halo avaliasaun rigorozu bá empreza sira ne’ebá mak iha duni vontade atu servisu hodi kontribui bá rai ida-ne’e.

“Tanba ne’e iha Primeiru-Ministru nia oin, hau husu ba imi ho haraik-aan teb-tebes katak, bainhira governu fo fiar ba imi atu halo servisu ba nasaun ne’e, tenke servisu ho didiak, ho vontande tomak, dezenvolvee imi nia aan, estadu presiza teb-tebes imi hotu ninia apoiu, nune’e mai ita hamutuk hodi dezenvolve Timor ne’e ba oin liu tan,” Ministru informa.

Purtantu, marka Prezensa iha enkontru ne’e Prezidente CCI-TL, Jorge Serrano ho estrutura no mós estrutura munisipál sira inklui eprezáriu nasionál sira.

Enkuantu, iha oportunidade ne’e mós emprezáriu sira aprezenta difikuldade ne’ebé durante ne’e enfrenta no husu bá Governu atu hamutuk buka solusaun.