Tekniku Reasente husi Diresaun Nasional Planeamentu Peskiza no Dezenvolvimentu Samuel Daniel Guterres hateten, bazeia ba levantamentu dadus, tipu uma tuir klasifikasaun iha semi permanente no permanente. Pagamentu sei tuir klasifikasaun ne’e no tuir item uma ho ninia medida.
Pagamentu sei bele hahú bainhira levantamentu dadus finaliza ona no tuir planu Ministériu Obras Públika sei presija tempu maximu fulan ida.
"Bazeia ba dadus ne'ebé ami ekipa tékniku husi obras publiku foti ne'e hare ba tipo uma, ba kalsifikasaun uma ne'e no uma ne'e iha semi permanente no premanente, no semi permanente nee mak hanesan uma balun ne'ebé didin ho kalen no stengah tembok," dehan Daniel iha nia knar fatin, Tersa (21/01/25).
Tékniku Reasente ne'e hatutan, hare ba uma sira ne'e governu halo pagamentu tuir tipo ne'ebé iha.
"Valor osan kiik liu ita sei konta husi baraka, tan ne’e osan ho valor kiik hahú husi dolar $100, balun $1000, no $3000 no balun mós $10.000, maibé uma ne'ebé klasifikasaun boot mak ba uma privadu balun $30.000 no balun to'o $100.000 kada klasifikasaun," katak Daniel.
Parte tekniku Ministerio Obras Publika nian sei hala’o prosesu elaborasaun dadus liuliu vitima eviksaun husi fumentu 1 fumentu 2 no mós área Bebonuk tasi ibun nian.
Tuir dadus ne’ebe Online INDEPENDENTE rekoilla, vitima afetadu ba eviksaun husi fumentu 2 hamutuk 288, Bebonuk tasi ibun 200, no fumentu1 hamutuk 92.
Hafoin levantamentu dadus, vitima eviksaun ho parte governu sei halo termu aseitasaun hodi bele halo tranferensia orsamentu ba idaidaik nia konta bankaria.
Portantu tuir observasaun jornalista INDEPENDENTE iha terrenu nota katak, vitima eviksaun sira hakbesik aan ba iha diresaun nasional planeamentu peskiza no dezenvolvimentu hodi hatama sira ida-idak nia dokumentus hanesan eleitoral no konta bankaria hodi hetan indiminizasaun.
