Sekretáriu Estadu Asuntu Toponimia Organizasaun Urbana Germano Santa Brites Dias hatete, governu fó tempu ba komunidade sira atu prepara aan molok ekipa tun hasai sira.

Tanba ne’e durante fulan ida nia laran, ekipa hahú ho diálogu uluk ho komunidade sira, hafoin halo levantamentu dadus hodi deside komunidade ida ne'ebé afeita ba alargamentu estrada no ida ne'ebé lae.

"Ekipa konjuta mai ho pasu tolu ka haat, primeriu halo uluk diálogu, tuir mai obras ho terras halo notifikasaunpois tau numeru ba fatin ne'ebé identifikadu atu nune’e nai bele prepara an, nia prazu nee fulan ida, depois seidauk hotu ita fo tan loron 15 hodi kompleta loron 45 atu nune'e ita bele koopera ho estadu ho governu nune'e dezenvolvimentu ne'e bele la'o," dehan Sekretáriu Estadu iha Antiga merkadu Surikmas, Kuarta (22/01).

Governante ne'e dehan, banhira levantamentus ne'e remata, ba komunidade sira ne'ebé afeita ba iha alargamentu nee tenki lori dukomentu ba iha Ministeriu Obras Públika hodi prosesa  indiminizasaun.

" Ita sira ne'ebé kona-bá ona numeru ka markasaun tenki ba iha terras tenki lori dokumentu eleitoral, foto ne’ebé hasai oha ita nia uma ne'ebé hamriik ba ne'e, keos, fahi luan, ai-horis ne'ebé alargamentu estrada nee kona-bá lori ba Obras Públika iha Rai-kotu depois prosesa osan ruma ba bele hetan termu aseitasaun," deha  SEATOU.

Nia dehan, bainhira hetan ona termu aseitasaun komunidade afetadu sira tenki prepara an hodi muda ba fatin ne'ebé seguru, nune’e governu bele prepara hodi loke estrada ne'e luan.

Xefe Suku Bairo Pite Joaninha Alves, hatete estrada importante tebes, tanba ne’e liu husi diálogu, SEATOU bele klarifika lolos estatutu rai no prosesu indiminizasaun ne’e, atu nune'e komunidade bele senti katak, desizaun justu duni ba sira.

"Hanesan Xefe Suku hare ba ida nee, alargamentu ba estrada nee importante tebes, entaun ho meius ida mak tenki halo mini diálogu ho komunidade atu bele hatete lolos klrafika lolos kona ba estatutu rai nian no nia prosesu indiminizasaun ne’e oinsa, atu nune'e komunidade bele senti katak ida ne’e justu duni ba sira," katak Xefe Suku.

Xefe Suku hatutan, nia parte agradese tebes ba SEATOU tanba, SEATOU mak iha direitu tomak atu atu halo alargamentu ba estrada.

Iha biban nee, Xefe Suku mós husu ba komunidade aldeia tolu ne’e atu koopera ho estadu liuliu liga ba alargamentu estrada iha suku Bairo-Pite.

Enkuantu, alargamentu estrada iha suku Bairo Pite sei hahu husi diresaun kruzamentu besik kompaña Timor blok area Fatumeta to'o iha manleuana.

Entertantu, aldeia tolu ne'ebé afeitadu ba alargamentu estrada refere mak aldeia Wedalak, Haburas no aldeia 05 de Outubro.