DILI: Prezidente Repúblika (PR) Francisco Guterres Lú Olo promulga ona alterasaun Lei Atividade Petroliferu (LAP) númeru 3/V husi Parlamentu Nasionál.

Deklarasaun imprensa Prezidente Repúblika promulga dekretu númeru 3/V husi Parlamentu Nasionál ne’e lee husi Xefe Kaza Sivil Palasiu Prezidensiál Francisco Maria de Vasconcelos iha Palasiu Prezidensiál Bairu-Pite, Dili, Kinta (17/01).

DILI: Primeiru Ministru Taur Matan Ruak lakohi atu halo espekulasaun ba desizaun Prezidente Repúblika ba Orsamentu Jeral Estadu (OJE) 2019.

DILI: Partidu opozisaun FRETILIN sei ezije ba governu atu informa planu sosa asaun ConocoPhillips no Shell liu husi orsamentu emprestimu nian, tanba atu foti ema ninia osan presiza tuir regra.

FRETILIN levanta ida ne’e hodi responde Reprezentante Governu ba negosiasaun mina no gás, Kay Rala Xanana Gusmão ne’ebé hateten sei loke dalan ba empresta osan hodi halo investimentu iha setór mina no gás.

DILI:Turista husi Europeia, Amérika no Austrália hamutuk na’in 2.150 halo vizita mai Timor-Leste hodi haree paizajen ne’ebé furak iha nasaun ne’e.

Diretór Jerál Ministériu Turizmu, José Dias Quintas hateten, Timor-Leste tinan ne’e 2019 fulan Janeiru hetan vizita husi ró kruzeiru boot ba dala rua ne’ebé lori turista husi estranjeiru.

faze dahuluk Timor-Leste hetan vizita ho turista hamutuk 450 no iha Kuarta (16/1), horisehik, hetan tan vizita husi ema estranjeiru hamutuk 1.700.

Turista sira ne’ebé to’o iha Timor koloka ba fatin tolu, Dili, Ermera no Likisá. Ema sira ne’e mós halo vizita ba área-área poténsia turizmu nian hanesan Kristu Rei, Muzeu Rezisténsia no seluk tan.

Iha vizita hirak ne’e hetan mós akompañamentu husi polisia sira hodi bele asegura viajen turista sira nian la’o ho di'ak durante oras ualu (8) iha Timor-Leste.

José dehan, vizitante barak liu tan bele aumenta reseita liu husi vistu turista sira ne'ebé kada ema ida $30, nune'e tau hamutuk bele hetan $64.500.

Iha fulan ne’e nia laran ró rua, espera iha tempu tuir mai sei mai tan tanba simu ona informasaun husi ajénsia sira katak sei mai tanba Timor-Leste iha paizajen furak iha nasaun Ázia.

Maski nune’e, prioridade ne’ebé presiza toma atensaun sériu maka infraestrutura iha Timor laran, nune’e bele fasilita di’ak liután vizitante sira.

Nia hatutan, iha tempu badak sei koopera ho portu hodi hadi'a infraestrutura bázika sira, tanba simu ona informasaun katak sira mós iha ona planu tau ona osan atu hadi'a bee no saneamentu.