"Membru militar na'in 2 sei alta husi fatin izolamentu HNGV iha loron 1 fulan-Fevereiru tinan ida ne’e hodi fila ba hamutuk ho familia hodi kontinua hala'o serbisu iha instituisaun militar,"deklara Maijor Guido liu husi konferensia imprensa iha Kuartel Jeneral F-FDTL Fatuhada, Sesta (31/01).
Xefe Diresaun Saúde Militar ne'e informa, bainhira membru F-FDTL na'in rua ne'e fila husi Xina, F-FDTL haruka imediata ninia membru ba HNGV atu halo observasaun.
“Membru militar ne’ebé fila husi nasaun Republika Popular Xina to'o iha Timor-Leste, tanba ne’e instituisaun permanensia ho HNGV haruka imediata membru ba iha HNGV atu halo observasaun durante loron 14 nia laran, laiha sinál hatudu sintomas ruma ne’ebé ligadu ho virus corona,”dehan Maijor Guido.
Tan ne'e, Maijor Guido konsidera informasaun ne'ebé jornal INDEPENDENTE públika katak "Deskonfia Suspeita Virus Corona, HNGV Izola Membru F-FDTL Ida", nu'udar informasaun falsu no husu jornal INDEPENDENTE husu deskulpa.
“Ami instituisaun militar husu ba povu tomak iha teritoriu timor laran katak, informasaun ne’ebé media INDEPENDENTE fó sai ne’e falsu, tanba husu inan-aman sira labele paniku,"dehan nia.
Iha fatin ketak, ezijensia husi F-FDTL, Xefe Redasaun jornal INDEPENDENTE Gaudéncio Marque Figueredo hatete, notisia ne’ebé jornal INDEPENDENTE públika bazeia ba faktus ne’ebé jornalista hetan iha terenu.
“Kestaun deskonfia kona-ba virus corona, ha'u hanoin normal, tanba iha nasaun ne’ebé de'it see deit bainhira nia fila husi nasaun ne’ebé hetan ona virus corona nia tenke suspeita, tama hotu iha prosesu diagnostika atu hatene ema ne'e hetan duni moras ne’e ka lae?. Agora ita haree fila fali ba kolega sira F-FDTL sira mós suspeita, tanba ne’e mak ami hakerek 'Deskonfia suspeita virus corona' no ami la hatete membru F-FDTL ne’e hetan virus corona,” dehan nia.
Tuir nia, membru F-FDTL ba konsulta iha HNGV no tama duni iha fatin izolamentu, ne'e faktus ida ne'ebé bele halo ema deskonfia.
Kona-ba husu deskulpa, Gaudencio hatete, kestaun la'os husu deskupa, maibé presiza haree no justifika media nia sala ne'e iha ne'ebé.
Nia hatutan, intensaun husi públikasaun jornal INDEPENDENTE la'os atu halo povu paniku maibé hanesan alarma ida hodi fó atensaun ba povu no ba entidade sira hotu.
“Informasaun ida ami fó ne’e laos atu halo publiku paniku, maibé publiku tenke hatene ida ne’e hanesan warning ba publiku tomak para sira atensaun, liu-liu ba governu no entidade sira ne’ebé iha responsabilidade ba kesataun ida ne’e,”dehan nia.
