Xefe Gabinete Interinu RAEOA-ZEEMS, Agustinho Caet konfesa katak, hafoin autoridade foun hetan posse sira hetan defikulidade atu asesu ba administrasaun no finansa tanba autoridade sesante laiha kolaborasaun di’ak.

Tanba ne’e, autoridade RAEOA foun sei konsentra iha Dili hodi rejolve assuntu ne’e atu nunee bele hetan asesu finanseiru iha Banku.

Nia dehan, Perezidente Auroridade foun José Luis Guterres halo ona viazen ba Oekusse dala rua ona hafoin hetan posse iha tinan kotuk (2019).

Iha nia viazen ne’e, Presidente RAEOA ne’e vizita Postu Unidade Polisia Fronteira (UPF) iha suku Bobometo, Postu Oesilo no halo inagurasaun ba kanalizasaun bee moos.

"Too agora ami seidauk hetan relatoriu, Sr. Sekretariu Regiaun rasik mos seidauk halo handover ida mai ami liu liu kona-ba prossesu atu assesu osan ba iha Banko,"informa Xefe Gabinete Interinu ne’e ba INDEPENDENTE, Kuarta (05/02) iha nia knaar fatin, Edifisiu ZEEMS Farol.

Tuir nia katak, normalmente iha pratikas kuandu autoridade tuan remata ninia mandatu tenke prepara dokumentos hotu, relatoriu no handover ba autoridade foun, ida ne’e akontese ba Sekretariu Regiaun hotu maibé realidade la akontese.

“Kuando mandatu hotu Sekretariu Regiaun Assuntu Finanseiru husik buat sira ne’e hotu laiha informasaun, kuandu ami lori dokumentos hotu kona ba planu, dividas, salariu ba Banku husu tenke iha assinatura ema na’in rua ka tolu labele Prezidente Autoridade mesak,”nia esplika.

Tanba kestaun ne’e, Prezidente Autoridade foun tenke involve iha assuntu ne’e hodi halo Konfirmasaun ho parte Ministériu Finansa, konsultasaun ba parte Juridiku/Legal, Gabinete Prezidente Autoridade nian, Gabinete Primeiru Ministru nian no parte Banku hodi envolve ekipa juridiku ida atu haree nia legalidade.

Hafoin konsultasaun sira ne’e, autoridade RAEOA foun foin bele asesu no sei rejolve dividas sira ne’ebé autoridade RAEOA husik hela.