Avião ne’e rasik komanda husi Air New Zealand Chief Operational Integrity and Standards Officer, Captain David Morgan lori sidadaun Nova Zelândia, Australian  Pacific Island ho Timoroan.

Estudante sira sei tama iha fatin observasaun durante semana rua (loron 14), molok fila mai Timor-Leste.

Evakuasaun emerjensia ne’e halo relasiona ho virus corona ne’ebé invade sidade Wuhan Xina ne’ebé hamate ona ema na’in atus tolu liu. Virus corona ne’e daet ona ba nasaun 25 seluk iha mundu.

Ministro Negosiu Estranjeiru no Kooperasaun, Dionisio Babo Soares sente haksolok ho assistência Nova-Zelândia nian lori governo no povo Timor-Leste hato’o obrigado wa’in ba estado no governo Nova Zelândia, liu-liu ba Vise Primeiru Ministru no Ministro Negosiu Estranjeiros Hon Winstons Petters ba apoio no prontidaun ne’ebé extende mai sidadaun Timor-Leste na’in 17.

"Ohin madrugada tuku rua ho balu liu, aviaun nova zelandia nian tula pasajeiru Nova-Zelândia rasik no hamutuk sidadaun azia pasifiku balu inklui timoroan na’in 17 iha xina, nune’e lori governu nia naran agradese ba Primeira Ministra Jacinta, no Ministru Negosiu Estranjeiru Peter no povu Nova-Zelândia tanba iha tempu defisil bele ajuda ita,"dehan Babo ba Jornalista sira iha Palasiu Governu, kuarta (05/2).

Ministru Babo mos hatoo solidariedade no simpatia ba Governu Xina ba situasaun ne’ebé sira hasoru, maibe ba Timor-Leste hanesan nasaun belun di’ak, maske iha momentu defisil maibé sira kontinua fasilita timoroan sira sai husi Xina.

Nune’e husu ba inan-aman no populasaun tomak akompana nafatin tanba agora estudante sira ne’e iha ona fatin di’ak hein semana rua kondisaun di’ak sira bele fila mai Timor-Leste.

Governante ne’e mos apela dala ida tan ba estudante sira ne’ebe molok ne’e mai ona husi Xina semana rua tenke aprezenta ba Ministeriu Saude hodi halo monitorizasaun ba saúde.