Partisipa iha dialogu ne’e, eis Primeiru Ministru Mari Alkatiri, eis Presidente Repúblika José Ramos Horta, eis Presidente Taur Matan Ruak (atual Primeiru Ministru), Xefe Estadu-Maior-Jenerál F-FDTL, Majór-Jenerál Lere Anan Timur, Veteranu Roque Rodrigues, ne’ebé lidera husi Presidente Repúblika Fransisco Guterres Lú Olo, iha Palacio Presidensiál, Aitarak Laran Dili.
Entretantu tuir informasaun katak eis Presidente Repúblika Kay Rala Xanana Gusmão hili ba kari aifunan nia inan hakiak durante tempu rejisténsia, ho naran Jacinta de Jesus, iha Bauro, Lospalos, Munisípiu Lautem, iha loron ne’ebé hanesan dialogu entre lider istóriku sira.
Prezidente Repúblika Francisco Guterres Lú Olo konvida líder istóriku no personalidade na’in-neen atu halo reuniaun iha loron 10 Fevereiru 2020 hodi sira-nia hanoin kona-ba situasaun polítika atuál hodi hakotu empase politika rai laran.
“Hamutuk ho líder no personalidade hirak ne’e,Xefe Estadu sei“halo análize no identifika opsaun sira ne’ebé di’akliu hodi hadi’a situasaun polítiku-konstitusional atual”. Subliña iha komunikadu imprensa.
Tuir observasaun jornalista Online INDEPENDENTE, katak lista prezensa ne’ebé Gabinete Presidensiál Repúblika prepara tau iha númeru um (1), eis Primeiru Ministru Xanana rasik la priense no nia kadeira ne’ebé prepara kedas iha liman loos Presidente Repúblika Fransisco Guterres, sei mamuk (laiha prezensa).
