Maibé esperansa povu la sai realidade, entre lider istóriku só uniku eis Presidente Repúblika nomos eis Primeiru Ministru ne’e mak la marka prezensa.
Kadeira iha Prezidente Repúblika Francisco Guterres Lú Olo nia liman loos mamuk. Kadeira ne'e prepara ba Kay Rala Xanana Gusmão. Maski nunee, kadeira ne’e kontinua halo mamuk no lista prezensa ne’ebé preparadu iha númeru 1 la priense too dialogu remata, ne’e signifika saida?
Tuir sosiedade nia prespetiva katak, lider istóriku sira inklui Presidente Lú Olo konsidera nafatin Xanana nuudar sira nia Maun Boot, nuudar Aman, Lider Karismatiku ida ne’ebé sira tenki respeita no entre sira laiha ema ida troka fali Xanana nia fatin tuur iha númeru 1, katak sira fó nafatin fatin ba Maun Boot Xanana iha númeru 1 iha kontestu funu no kultura.
Maski iha dialogu ne’e Maun Boot fila kotuk no ba kari aifunan ba nia inan hakiak iha Lospalos, hafoin partisipa iha Grande Intrevista iha GMNTV.
Iha grande intrevista, lider karismatiku ne’e koalia nia rajaun katak la presiza ona nia partisipasaun iha dialogu ne’e tanba Presidente Repúblika hasoru emar lubuk ona inklui Konsellu Estadu no fiar katak sei iha solusaun di’ak ba nasaun ne’e.
Maski nunee, dialogu ne’ebé partisipa husi eis Presidente Repúblika José Ramos Horta, eis Primeiru Ministru Mari Alkatiri, eis Presidente Repúblika Taur Matan Ruak (atuál Primeiru Ministru), Komandante F-FDTL Maijor Jeneral Lere Anan Timur no Veteranu Roque Rodrigues, kontinua lao too remata.
PR Lú Olo realiza dialogu ne’e ho intensaun atu buka solusaun ba impase politika ne'ebé TL hasoru hela.
Lider nasionál sira ne’e hetan konvite ofisial Prezidente Repúblika Francisco Guterres Lú Olo.
Tuir observasaun jornalista jornal INDEPENDENTE iha Palasiu Prezidensial, lider nasionál ne'ebé marka prezensa dahuluk mak Maijor Jeneral Lere.
Atual Komandante F-FDTL ne'e asina lista prezensa iha tuku 08.58. Hafoin, iha tuku 09.16 Ramos Horta ho oin-midar asina lista prezensa.
Iha menutu hirak tuir mai, 09:23, PM Taur ho hamnasa hakat tama ba palasiu no hahú asina lista prezensa, no ikus liu, iha tuku 09.27, eis PM Mari Alkatiri mós hakat tama no asina lista prezensa.
Hafoin asina lista prezensa, lider nasionál na'in haat ne'e hein iha sala CPLP durante menutu 13, no iha tuku 09.40 sira hakat sa'e ba fatin reuniaun Coni Santana no simu diretamente husi PR Lú Olo.
Lider hirak ne'e hahú tuur iha kadeira ne'ebé prepara ona ba sira, maibé iha kadeira ida ne'ebé hamriik iha PR Lú Olo nia sorin loos mamuk hela. Maske nunee, enkontru kontinua lao no remata iha 15.49.
