Estensaun no deklarasaun ba Estadu Emerjénsia mai ho fundamentu iha subsisténsia ba situasaun kalamidade públika.
Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ohin. Horseik, Konsellu Superior Defeza no Seguransa no Konsellu Estadu husu Prezidente Repúblika haruka pedidu autorizasaun ba Parlamentu Nasionál estensaun Estadu Emerjénsia dasanuluk.
Pedidu Governu ba estensaun estadu emerjénsia tanba haree ba evolusaun preokupante ba situasaun epidemiolójika no proliferasaun kazu rejistadu ho SARS-CoV-2 ne’ebé aumenta iha nível rejionál no nível mundiál. Iha nível mundiál, tuir Organizasaun Mundial Saúde, iha 26 janeiru 2021 rejista kazu konfirmadu liu100 250 000 (milaun atus ida rihun rua nulu resin lima-nulu) no liu 2 100 000 (milaun rua rihun atus ida) mak mate.
Iha Repúblika Indonézia, ita-nia viziñu no belun, rejista kazu konfirmadu liu miloens ida ho infesoins husi SARS-CoV-2 no liu 28 000 mak mate tanba COVID-19. Iha provinsia Nusa Tenggara Timur kazu infesaun konfirmadu liu 4000 (rihun haat) no hamate ona ema na’in-110 (atus ida sanulu).
Deklarasaun estadu emerjénsia sei abranje territóriu nasionál tomak.
Estadu emerjénsia sei parsialmente suspende direitus ba sirkulasaun internasionál, liberdade sirkulasaun no fixasaun rezidénsia ba kualker pontu iha territóriu nasionál, direitu reuniaun no manifestasoins, liberdade ba kultu, no direitu propriedade no inisiativa ekonómika privada.
Autoridades públikas kompetentes sei impoin restrisoins nesesárias ba redusaun risku hadaet nian no ezekuta medidas prevensaun no kombate pandemia, hanesan distansiamentu sosiál, kuarentena ba suspeitu infesaun, izolamente ba moras no suspeitus, konfinamentu domisiliáriu, uzu obrigatóriu maskara, fase-liman no distánsia fízika.
Desde fulan marsu, hafoin rejista kazu konfirmadu ida ho SARS CoV-2 Timor-Leste implementa kedas estadu emerjénsia atu fó kbiit ba Governu atu foti medidas prevensaun no kontrolu hodi hases sidadaun hotu-hotu husi kalamidade públika ne’ebé bele mosu husi moras COVID-19.
Ohinloron Timor-Leste rejista kazu pozitivu hamutuk na’in-18. Desde marsu 2020 to’o ohinloron, kazu konfirmadu ho SARS-CoV-2 hamutuk na’in 68, rekuperadu na’in-50 no laiha ema ida mak mate.
