Razaun husi suspensaun ne'e, Agustinho hatete, tanba nia parte simu informasaun balun katak iha ema Xina na'in ida husi na'in 16 ne'ebé hala'o viajen mai Timor Leste deskonfia pozitivu virus corona.

“Tuir informasaun ne’ebé migrasaun simu sidadaun Xineza ne’ebé (hetan) virus corona ne’e dadaun iha Bali, tanba ne’e mak ami halo desizaun hodi suspende provizoriu maluk Xineza la bele mai iha loron 03 Fevereiru," dehan Agostinho ba jornalista sira iha Kuartel Jeral PNTL Kaikoli, Dili (04/02)

Desizaun ne'e, nia dehan, ho objetivu atu fó oportunidade ba sira hodi halo ezame saude ba mediku iha Bali.

"Hafoin hotu tiha bele lori ho sira-nia deklarasaun saude no atestadu mediku ne’ebé iha mai Timor Leste hatudu ba iha ajensia sira, banhira komprovadu sira livre husi virus corona sira bele tama iha teritoriu nasional Timor Leste," dehan Agostinho.

Nia hatete, nia parte simu orden atu halo serbisu koordenasaun ho ajensia sira nomeadamente ho Aviaun Air North, Sriwijaya Air no Citilink hodi suspende sidadaun Xina ne’ebé tama iha Timor Leste.

“Orden ne’ebé fó verbalmente, tanba ami konsuta ho Ministru Interior Interinu Filomeno Paixão de Jesus halo desizaun ida ne’e, maibé laos atu halo avizu,” dehan nia.

Maske nune'e, nia hatete, ikus mai Xina na'in ida ne'ebé deskonfia hetan virus corona la indentifika.

“Ita tenke halo desizaun, maibé iha desizaun ne’e halo ema barak sai konfuzaun no ema barak mós la kontente, maibé prontu ida ne’e tenke halo duni par evita labele akontese iha Timor Leste," nia hatete.

Nia afirma, orden ne’ebé hasai iha loron 3 Fevereiru validu ba loron ida de'it.

"Maibé liu ida ne'e siadadaun Xineza atu mai Timor Leste, maibé sidadaun Xineza tenke hatudu deklarasaun saude no atestadu mediku ba ajensia sira iha aeroportu, no sira ne'ebé hela antes ona iha Timor Leste atu halo viajen ba iha rai li'ur ida ne’e la bandu sira atu halo viajen," nia afirma.

Konsidera Xefe Postu Migrasaun Aeroportu Komete Erru

Entrertantu, maske rekoñese iha desizaun bandu sidaduan Xineza tama TL, maibé DNSM deside hodi muda Xefe Postu Migrasaun Aeroportu Dili, Inspetór Polisia Ernesto Maia ne'ebé fó sai avizu kona-ba bandu simu sidadaun Xina.

“Durante ne’e nia hala'o serbisu di'ak, mais tanbá situasaun dala-ruma simu orden barak, la kleur orden ne’e dadeer tuun, la kleur meudia tuun, la kleur kalan mós tuun fali, entaun dala ruma nia mental la forte nia halo buat ne’e,” dehan Agostinho.

Nia dehan, ofisial PNTL ida ne'e ladun analiza didi'ak orden ne’ebé fó ba nia.

"Tuir loloos ne’e nia tenke analiza didi'ak, se la hatene husu Komandante ka Xefe Setór ne’ebé fó orden ba nia, par bele kumpriende. Tanbá ne’e, ba oin atu prevene aktu sira ne’e persija halo koresaun, kontrola fó orientasaun ne’ebé klaru".