"... Hasai tiha imi-nia roupa prespetiva partidu nian, hasai tiha imi-nia roupa ida kotak-kotak," dehan Prezidente CNJTL Maria Dadi Soares ba jornalista sira hafoin ronda diálogu ho Prezidente Repúblika Francisco Guterres Lu Olo iha Palasiu Prezidensiál Bairu-Pite, Tersa (04/02).

Tuir CNJTL dehan, lider antigu sira hanesan Kay Rala Xanana Gusmão, Marí Alkatiri, Taur Matan Ruak, Ramos Horta no Lere Anan Timur presiza atu sees aan husi partidu politika iha tinan rua oin mai.

"Tempu to’o ona atu ita-nia lider boot sira liu-liu maun boot Kay Rala Xanana Gusmão, Marí Alkatiri, Taur Matan Ruak, Ramos Horta, Maijór Lere, sira ne’e figura sentral, sira ne’e figura nasionál, sira ne’e se bele 2023 ba leten atu sees husi partidu,” dehan Dadi.

Nia esplika, lider antigu sira ne'e sees husi partidu hodi tuur hanesan aman atu fó solusaun iha estadu ida ne’e bainhira presiza.

Kona-ba impase politika, Dadi dehan, CNJTL fó fiar ba PR Lu Olo.

“Ita-nia esperensa sei hakotu impase polítika dalan ida mak PR nafatin atu loke dalan diálogu. Tanba ne’e CNJTL 100 pursentu, absulutamente fó fiar PR iha kompetensia tomak no desizaun sei ba bem komum, liu-liu ba povu ida ne’e, liu-liu juventude sira,” dehan Dadi.

Maske nune'e, CNJTL prefere liu atu iha governu grande inkluzaun tanba tetu katak eleisaun antesipada sei la fó solusaun.

"Defaktu hatudu katak eleisaun antesipada mós la fó solusaun ida bainhira boa vontade ita-nia polítiku na’in sira nafatin kontinua laiha," dehan nia.

Iha tempu badak, nia dehan, CNJTL ho lider rezistensia sira sei ba hasoru lider partidu polítiku  no lider nasionál sira no orgaun estadu óinsa atu tuur hamutuk.

"Tanba hakarak ka lakohi tenke ko’alia frankamente katak haree husi prespetiva parte polítiku problema kiik-oan, problema mak sira la tuur hamutuk," dehan nia.