Haktuir iha karta ne’e katak: Relasiona ho akontesimentu iha nasaun Xina, Provínsia Wuhan, orientasaun ministru liuhusi Diretór Jerál Servisu Migrasaun orienta verbalmente mai Xefe Postu Aeroportu Dili, “Apartir agora ba oin sei la autoriza sidadaun ne’ebé uza pasaporte Xina la tama nasaun Timor-Leste”.

Karta ne’e rasik hasai iha loron 3 Fevereiru 2020, ne’ebé asina husi Xefe Postu Aeroportu, Inspetór Polisia Ernesto Maia.

Maski nune, konteúdu karta ne’e sei hamosu konfuzaun iha termu linguazen. Sosiedade sei duvida ba orientasaun ho konteúdu karta “Apartir agora ba oin sei la autoriza sidadaun ne’ebé uza pasaporte Xina la tama nasaun Timor-Leste”.

Tuir sosiedade sira analiza liu husi Media Sosial tuir termu lingua katak ho konteúdu karta ne’e nia signifika katak laiha autorizasaun bandu sidadaun xina tama timor. Tanba ne’e, obejtivu husi karta ne’e seidauk klaru.

Maibé iha sorin seluk, Ministru Estranjeiru Negosiu no Kooperasaun, Dionisio Babo deklara seidauk iha autorizasaun ofisial husi Governu atu bandu sidadaun xina tama timor.

Too notisia ne’e publika, seidauk iha klarifikasaun husi entidade Polisia Nasional Timor-Leste.